صدقتوني،
اللي مخبية من وقت طويل بان فـِ عيوني
انا لا ابيض ولا اسود برضه
لعيّب وبيخسر على أرضه
كل اما بيهرب جوه الليل بيلاقي الشمس اللي تطارده
انسان عادي
لوني .. رمادي،
مش شخص مميز عند الناس ولا حد بيحلف بحياته
وبصدق كل اللي خدعني .. علشان بَحترم أجتهداته
كداب، صادق
سفاح لكن عنده مبادىء
وبحكم الوقت بقيت بقدر
بقدر أخبي .. وبعرف أداري
انا من مواليد برج الدمعة
مواليد الحُزن الإجباري
حزن اما اتقسم ع الدُنيا
فيه ناس أخدوا نصيبهم كامل
بحزن على موت فنان شامل
والخصم اللي بيوجع عامل
وببص لنفسي فـَ برجع أقول .. اهو نص العمى ولا عمى كامل
مابقاش فاضل جوايا مكان
تركن عربية من الأحزان
ويقولي صاحبها يومين وأرجع .. ويسيبهالي العمر بطولة
اسف على كل اللي بقوله
على ضل اتحول فجأة لشمس
انا تايه بين بكرة وبين أمس
وفاقد كل شعور اليوم
بهرب للنوم وأهرب منُّه
وبحَن لناس مش بيحنوا
انسان كل ما بيزيد سنُه
بيتوه ويقول انا رايح فين
كُل اما اشتاق لأخويا بقول .. كلها سنتين
سنتين بيجروا كمان سَنتين
وكمان سَنتين
ولحد ما قَلبي طلعه عينين من كتر الشوق
اجي ابص لفوق
تيجي ضربة لتحت
وببص لتحت .. اتخان مـن فوق
واهو دمي معاتب فـِ سجايري .. وبيسأل مين فينا المحروق
ـ ياخي بكرة تروق
بَس يا كداب
كُنت أقعد زيي فـِ ضهر الباب
واشهد على ناس جاية تخونك
لكن لابسين ماسك الأحباب
كاسك يا عذاب
كاسك يا مرار
شاعر وبيتقن ضرب النار
ماشي وعمال يفضح اسرار
ويبين وجعه الجواني
هَهرب تاني
بحثا عن علة أحزاني
قَلبي بيتكلم ألماني، والناس مش فاهمة العامية
والمرة دي ..
لا هتقدر دَمعة توقفني
ولا أشوف عواميد جاية ورايا
ولا قلبي هَينده فـ اسمعله
ولا نجمة هتلمع جوايا
وأتمنى العالم يرحمني
ومايجرش شكلي مع الأيام
واتمنى ان حد قابلني فـِ يوم
يقرا اللي فـ عيني وبالترتيب
ـ حِب يا قلبي
ـ عيشها يا أخويا
ـ غني يا فيروز
ـ احزن يا غريب
Негізгі бет مصطفى ناصر || الغريب
Пікірлер: 49