أغاني طمبور
محمد النصري
قالو جاني علي رويحتي انا .. سمو ريدتنا السخافة
إلا ما اهتميت وحاتك وكنت بشوف دنيانا يافا
إيدي فوق مجداف هوانا ومهما كان بعد المسافة
قصدي مركب ريدنا ترسى وتلقى بين عينيك ضفافا
كنت فاكرتك يوم عرفتك في زمن ريدنا المعافى
خاتفة من تاجوج جمالا وماخدة من مريم عفافا
الا زهرتنا البتبسم زي عروس في يوم زفافا
للقدر سبتيها راضي لما عجل بي نشافا
درتي الفقدت بريقا وبهجتي الصارت خرافة
ذكرتك بينات ضلوعي ولسة في عيني فافا
الا بعدك ما بجرب تاني دنيا الريد بخافا
ولا عيونك قلبي بقدر في الزمان يعشق خلافا
كنت مجازف بي حياتي وروحي ساكت الله شافا
وداجي زي عرب الصحاري الراجي تشرب من جفافا
آه علي روحي البتصرخ وانتي ما هماك هتافا
والمصير قداما اسود والضياع آخر مطافا
الزمان علمني اصبر كلما سلط لي آفة
والسنين من قمت صغير اصلي ما شفت غير عجافا
الوداع يا زول دواخلو ماها زي ظاهرو القيافة
الوداع يا دنيا لي اتفرش بالهم لحافا
الوداع آخر كلامي ويلا نتجرع زعافا
وقبل اقول انا في الرسالة ليكي بكتبا فوق غلافا
Негізгі бет محمد النصري - قالو جاني علي رويحتي
Пікірлер: 12