ماسكْلَبَتْ
ماسكْلَبَتْ..
ركَزَتْ وكِت دَقَّن حريم الحِلَّه دلوكة النواح
وما شمَّتَتْ فيك البِتاوقولك كما شمس الصباح
كانت تزغرِد كلُّما تَلْكُد مصارينا الجراح
كانت ملخبطه بالوجع لاغنَّى خاطِره لا استراح
وهسِّع وكِت كلَّ الخلوق تفْتَح خشوما تقَهِّي فيك
راجياك تهِز قلبك وكِت يِتنحنح الحزن الجواك
يفتح عيونك ضِفَّتين
شريان يضُخ للنيل دموع
ووريد يصُدّ الوجعه ليك
ما تشتغل بالهم وكت يِكْتر عليك
وماتنشغل...
والله ساعة الحارَّه كان حفيانه بتْدَرَّع قماش افراحي..
بتوكَّل واجيك يافرحه مالك تندهيني غياب محل ما اشتهيك
ياوجعه مالك ياخ تقول خلقونا من فدة تراب
مالك تَكَلْكِلي في صُغار دمعاتي هادِي المرَّه شِريان القلِب
حالِف يضوِّقَك العذاب
مالك محل مانَبْنِي للافراح رويكيبه ونغم
نلقاكِ زي رقراق شمس بِدخل علينا من اي باب مالك..؟!
سألتك بالذي لا بموت ولا مِنِّك بِهاب وانا يوم سكونَك بَنْدفِق ريقين من الغنا والسرور
نَفَسين من الضل
ساعة الشمس البِتَقْلي البُن تلاقيك
أو شعاعين في الضُلُمَّه القاسيه واحساسات ونور
او قول تصاوير من خيال
اني البِنَيَّه الكنتَ يوم تزعل عشان عاشق غيور
كانت تراضيك
انو غيرك يا ضرا الرِجَّاله ساعة الحاره
حرَّم ما بدور يازول بذخ
حنيه...
نوبه ...
ودين وحوليه وبدور
يازول وكت يِنْضُم بِصِن كل الحضور يازول وكت يفتح شراع الحِن... بتتعلم صُغار القسوه والقيف والطيور يومداكَ تتذكر...
وكِت كان قلتَ لي نمشي البحر...
همّيت عشان كانت مواعيد مرقة الحوريه
جِنية المغارب
كنتَ بتوقَّع حضورا اشان وكِت جيتك
تصِن كلْ موجه في عمق المحيط كل اتساع للموجه برجاك
اشتها العطشانه لي موية المطر
كان يوم حضورك...
دقة الزار لي شياطين عشقي
كان حوليه
كان رنَّة وتر
كان ايِّ حاجه بتفصل الروح
عن دُعابْة الخاطِر المليان سَكَر
كان ... كان ...
ولسَّع
إنت ركَّازة القصيد
لسَّع تفاصيل اشتها الدم للوريد
لسع صغار الحله بستنوك عيد
لسع شيوخ الخلوة منتظرين رجوعك للمسيد
لسع بتلفُظَك الحروف شان القلم يِرْجاك مستِّف روحو ريد
لسَّع حريم القهوه فاقدات جنزبيل النشوه
والبُن مر ...
عشان كنتَ بْتطَعِّم اي فنجان قهوه بي إحساس جديد
اتخيَّل...
الناس قاعده تتوقَّع مروقك منَّي
من رِحم القصيد
الناس تتاوق ليكَ من باب الحُزُن
ترجاكَ عيد
وانت بْتوانِّس في صدى الاحساس وفي فَضْلة بَكاري القهوه
مالك يا عشاي
مالك وكت سمّيتك الضل البَقيف برجاهُ ما همّاك حفاي
مالك وكِت سمّيتك العكاز
ولا راعيت عماي
مالك وكت سميتك القمر
البتاوق ليهُ
ما ضوّيت سماي
مالك وانا اتحديت حبال اوتاري ماسامع غناي ؟؟
مالك ؟
إذَن خليني ساااي
وانا من زمان كان اقْتَنِع إنك رفيق زولا سواي
لكن محل ما افوت بَعيد بلقاكَ في كَرَيات دماي
بلقاكَ في شهقة زفير انفاسي من إحساسي جاي
والقاكْ إذا خارت قواي
مصدر وهج روحي وقواي
والقاكَ في كفتيرة امي الغاليه شاي
والقاك معاي
________________________________-
اشترك بالقناة للوصول الي كل المواد الحصرية وكواليس برنامج قهوتنا وحالات الواتس بشكل حصري
© Nidal Hasan Alhaj Official KZitem Channel ©
القناة الرسمية لكل اعمال الشاعرة نضال حسن الحاج
لا تنسو " الأشتراك " وتفعل " الجرس " 🔔 ليصلك الجديد و الحصري .
اشترك في القناة Subscribe : ▶ / @-nidalhasanalhaj6171 ◀
#نضال#الريدة_الحتالة #قهوتنا #نضال_حسن_الحاج
هذه القناة مدعمة بادارة شركة سودادوت وقناة محفضة، لطلب الأنضمام للشركة برجاء الأشتراك من اللينك التالي:
sudadot.net
© Powered by MAHFADAH #على_سبيل_الجمال
Негізгі бет ماسكْلَبَتْ - نضال حسن الحاج
Пікірлер: 23