قصيدة على البحر الهلالي للشاعر صالح حسن الكيرعاني
مبريّةٍ سحم الذياب اتعوي بها
واليا اروحت ريح الخطر تلتوي بها
.
حثّيت رجلي لين شرّفت فوقها
ورجلي على وطي الصعيب اتحريبها
.
اشعلت وسط الصدر يا طايف الهوى
نارٍ و ذعذاعك يزوّد لهيبها
.
خذ في طريقك نفحةٍ تشرح الحشا
من هاجسٍ عُصم المثايل يجيبها
.
ما يغبن الرجّال مثل الحصانيه
اللي ليا شبعت تحطّك حريبها
.
متجاهلين اللي حدر في بطونهم
ويصبح جميلك جمرةٍ تنكوي بها
.
ترى الرخوم اتجازي الطيب بالردا
وتستحقر اللي دايمٍ يعتني بها
.
اللحية المتردّيه في شبابها
تبقى على طبع الردا في مشيبها
.
اللي حياته ما تنومس رفاقته
ولا تغيض المعتدي وش يبي بها ؟!
.
كم عين شافت من الاجانيب سِعدها
وجاها عماها من سوايا قريبها
.
اليا فسد عضوٍ من الجسم فقطعه
وشلون تنقل بندقٍ بان عيبها ؟!
.
سم الخبيثة لا تركته بينتشر
ويقضي على باقيك حامي لسيبها
.
ترى اللذي تغليه من بدّة العرب
شمسه على دنياك عجلٍ مغيبها
.
بعض الكبود امن المقدّر تفتّتت
عسى المسيطر يوم تصبر يثيبها
.
سلواك يالمشحون حلمٍ تراوده
والمجتهد بعض الهقاوي يصيبها
.
اغنم ربيع الغايه اللي وصلتها
واقنع لاشفت الصيف قام ايعدي بها
.
من ذاق لذّةٍ حاجةٍ ذاق مُرها
لا تحسب انّه دايم ابيهتني بها
.
المصغر اللي دَرّها كنّه الشَّهَد
لا كبر حاشيها تغيّر حليبها
.
حتى الدلال اللي على الجمر فايحه
شرّاب صافيها بيوصل سريبها
.
ختمانها نثني صلاةٍ معطّره
على رسولٍ سنّته نهتدي بها
.
.
#صالح_حسن_الكيرعاني
Негізгі бет مبريّةٍ سحم الذياب اتعوي بها
Пікірлер: 225