«Менің балам лаңкес емес, оған дәлелім бар». Осыған дейін қайтыс болған ұлының сүйегін іздеп жүрген Бүркіт Жұбаназаров, полицияның "ұлың террорист, қолында қаруы болды" деген сөзін жоққа шығару мақсатында редакциямызға бейнежазба жолдады. Онда Русланбек Жұбаназаровқа оқ тиіп, жарақат алған сәті түсіп қалған екен. Полиция қызметкерлері айтқандай, ұлымның ақтық демі үзілген сәтте қолында ешқандай қару болған жоқ, сол себепті ұлымның сүйегін қайтарсын дейді ол.
Бірнеше күн бұрын Ақтөбе облысының тұрғыны Бүркіт Жұбаназаров, 7 қаңтарда мүрдесі табылып, мәйітханаға жеткізілген ұлының сүйегін таба алмай жүргенін айтып, Информбюроға сұхбат берген еді. «7 қаңтарда қайтыс болған адамды 8 қаңтарда террорист деп таныған құқық қорғау органы ешқандай сот үкімін, видео, фото дәлел көрсеткен жоқ. «Балаңыз - террорист, денесі берілмейді» деп шығарып салды, - деп наразылық білдірген болатын марқұмның әкесі.
БҮРКІТ ЖҰБАНАЗАРОВ, Русланбек Жұбаназаровтың әкесі:
- Тауып берсін. Оқ тесіп кеткен, сенің балаңның қалтасынан наркотик шықты, қасында екі пышақ жатыр деп бізді қайтарып отыр. Жұмысқа кеткен бала. Белгісіз жағдайда ажал құшып отыр.
Осы күннің ертеңінде Бүркіт Жұбаназаров, баласының соңғы демі үзілген Ақтөбедегі Әбілхайыр хан көшесінің 27-ші үйінің ауласындағы бейнекамераға түсіп қалған мына кадрларды тауыпты. Онда Русланбек Жұбаназаровқа оқ тиіп, қасындағы жігіттердің жараланған азаматты сүйреп, жақын маңдағы үйдің қасына жеткізе алмай жанталасқан сәті көрінеді. Полиция қызметкерлері айтқандай, ұлымның қолында қару жоқ, дәлелсіз ұлымды террорист деп жала жапты дейді марқұмның әкесі.
БҮРКІТ ЖҰБАНАЗАРОВ, Русланбек Жұбаназаровтың әкесі:
- Ол жерде ешқандай да террорлық әрекет жоқ. Қашып келе жатқан балалар, оқтан қашып, жауыздықтан қашып келе жатқан балалар.+ Менің баламды қорғаймын деп, өлігін далаға тастамайық деп сүйреткен ол балаларға да рахмет.
ЕРБОЛАТ САРҚҰЛОВ, Ақтөбе облыстық ПД баспасөз қызметінің жетекшісі:
- Қақтығыс нәтижесінде террористік акцияның 1 қатысушының көзі жойылды.
Оның үстіне, екі күн бұрын берген Ақтөбе облыстық ПД ресми түрде «бір лаңкестің көзін жойдық» деген осы хабары да қаралы отбасын одан ары қамықтырған. Құран оқитын қабірін таппай отырғанымыз аздай, енді ұлымның атын қаралап жатыр дейді Бүркіт Жұбаназаров. Бұл кісі ұсынған бейнекадрларды Ақтөбе облыстық полиция департаментіне, ІІМ, Ақтөбе облыстық прокуратурасына да жолдадық. Алайда, ІІМ - Ақтөбе облыстық прокуратурасы жауап береді десе, прокуратура полиция департаменті жауап берсін деді. Ал, ПД баспасөз қызметі, осы сұхбатында айтқанын жазбаша түрде ғана жолдап, өзге ақпар бермеді.
Ирина Советжанқызы, Жанар Қожанов
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#террор #Ақтөбе #жаппай_наразылықтар
Негізгі бет «МЕНІҢ БАЛАМ ЛАҢКЕС ЕМЕС, ОҒАН ДӘЛЕЛІМ БАР»
Пікірлер: 215