كلمات: تميم البرغوثي
_----_----__--
منصورة يا مصر مش بجميلة العسكر
احنا اللي روحنا بدري بس مش اكتر
قول للي روح عشان يرتاح فما ارتاحشي... الراحة كل ما تستعجلها تتأخر
و اللي هينزل هيحكم لو ما روحشي .. قصر الرياسة ببلاش بس انت مستخسر
***
قصر الرياسة مفيش بينك وبينه كتير
في سلك شايك
و كيس رملة
و كشك غفير
لو جيت لوحدك هيضرب و الرقاب هتطير
و ان رحت مليون هيهرب و انت تبقى امير
رئيسنا واحد شهيد يحكم من التحرير
قصر الرياسة الجديد بصينية و مدور
****
منصورة يا مصر بجميلة خيام الخيش
بيحرقوها عشان تمشي فما تمشيش
يا مصر عمر ما في ثورة تقوم بشويش
و الملك .. ده اللي اديتيه للعسكري بقشيش
حق العيال اللي ماتوا في طابور العيش
وبنت عروها في الشارع
وشيخ ازهر
****
يا حاجة ياللي بتقري الكف و الفناجيل
اقري وشوش البشر عن مصر تلقي دليل
ده حقنا في مصر
مش هنسيبه للتساهيل
و ان قلتي نصبر يومين يبقى هنصبر جيل
اجلنا قبل كده... فادنا بأيه التأجيل؟
رمي الجثث في الزبالة في الضحى الأحمر
****
منصورة يا مصر بجميلة ولاد و بنات
بجميلة اللي اتحبس
بجميلة اللي مات
بجميلة التريقة و الضحك في الازمات
ودم فوق الرصيف ناقش صور و ايات
يا مصر ياللي انتصرتي في جمعتين و تلات
نفس العدو هو هو بس متنكر
****
الصبح طالع لقى دبابة فوق راسه
مربعة فوق رقبته و كاتمة انفاسه
والشرق مقفول و ختم النسر ترباسه
قام خبى شمسه ووزعها على ناسه
على العيال اللي ماتوا غدر و انداسوا
بقى شرق في كل جسم و شمس بتنور
***
الشعب واقف و صدره للرصاص عريان
والدولة خايفة و لافة نفسها في جدران
وزي ما الحاوي ممكن يخنقه التعبان
شوفوا حيطان السجون بتلف ع السجان
والفالح اللي بيتهور على النسوان
ما شوفناهوش ع الحدود يعني بيتهور
***
كان للفراعنة اله قرد و اله تمساح
وللاله كهنة و عسكر يقف بسلاح
وخزنة متقفلة بالضبة و المفتاح
وقصر يشبه قصور الجمهورية براح
يا عيني ع الالهة بقوا فرجة للسياح
ياللي بنسر و سيفين فرحان و متكبر
الشمس تدعى الغزالة في اللغة
فأعلم
وبالغزالة المضيئة في السما بأحلم
غزالة ممكن تبين طبعها الوحشي
ما تغركمش الاسامي و رقة المبسم
دي شمس و اللي يكتفها ما يفلحشي
و مصر حالفة
هتتحرر
هتتحرر
Негізгі бет Музыка منصورة يا مصر - مصطفى السعيد
Пікірлер