რაც ძალიან გვეძვირფასება - არაფერი იკარგება უკვალოდ!
-----------------------------------------------------------------------------------
ტელეკომპანია „ოკრიბა-ტვ“-ს 1997 წლის შემოდგომაზე
შევუერთდი. ტყიბულის ტელევიზიაში გატარებულ
საინტერესო პერიოდს, კიდევ უფრო დატვირთული
და შინაარსიანი თვეები დაემატა. ძალიან ბევრ
ძვირფას ადამიანთან მიწევდა შეხვედრა, რაც
მეხსიერებაში სამუდამოდ დამრჩება. მაშინ ვერ შევძელი
გადაცემები ჩემს არქივშიც შემენახა... გავიდა 20 წელი და
ამ გადაცემებმა ჩემამდე მაინც მოაღწია, რასაც დიდ
ბედნიერებად ვთვლი!
ამ ტელეკომპანიაში მუშაობისას,
ცნობილი ქართველი მსახიობების მონაწილეობით
რამდენიმე გადაცემა შეიქმნა, რომლის ავტორი და
წამყვანი დავით ბეჟიტაშვილი გახლავთ, კომპიუტერული
გრაფიკა გოჩა ხავთასს ეკუთვნის, ხოლო ოპერატორად
მე ვიმუშავე. მონტაჟი - კობა მეკარიშვილი,
პროდიუსერი - ვანო ცნობილაძე, რედაქტორი - ვაჟა ბაქრაძე.
ეს გადაცემა 1999 წელს შეიქმნა.ჩვენ სტუმრად
ქართული კინოსა და თეატრის მშვენებას,
ქალბატონ დოდო ჭიჭინაძეს ვესტუმრეთ.
იგი გულთბილი მასპინძელი და მოსაუბრე აღმოჩნდა.
28 დეკემბერს მისი დაბადებიდან 93-ე წელი შესრულდა.
ეს გადაცემა სწორედ ამიტომ გავიხსენეთ.
მომავალმა თაობებმა უნდა იცოდნენ, რომ უფროსი
თაობის ქართველი მსახიობები თავისი სილამაზითა და
მსახიობური ნიჭით „ჰოლივუდის“ ნებისმიერ მსახიობს
მრავალი წლის შემდეგაც დაჩრდილავენ...
-----------------------------------------------------------------------------------
მსახიობი თამარ (დოდო) ჭიჭინაძე
საქართველოს სახალხო არტისტი (1976 წელი),
საქართველოს დამსახურებული არტისტი (1960 წელი),
საქართველოს კინემატოგრაფისტთა
შემოქმედებითი კავშირის წევრი
დაბადების თარიღი -1924 წლის 28 დეკემბერი,
გარდაცვალების თარიღი - 2009 წლის 3 ნოემბერი,
(84 წლის ასაკში).
დაბადების ადგილი: ქ. ქუთაისი.
დაამთავრა საქართველოს კინოსტუდიასთან
არსებული კინომსახიობის სტუდია 1945 წელს.
1950 წლიდან იყო კოტე მარჯანიშვილის
სახელობის დრამატული თეატრის მსახიობი.
---------------------------------------------------------------------------
კინოში მხოლოდ 17 როლი ითამაშა.
გადაღებულია ფილმებში:
(გამცილებელი - „ასეთი სიყვარული“ (2006);
მარო მაყაშვილი -„გაფითრებული თებერვლის ლანდი“
(2005); „შური“ - (2000); „ნეტავ აღარ იწვიმოს“ - (2000);
„ვალსი პეჩორაზე“ - (1992); „ბილიკი“- (1987); ქეთევანი
-„ორომტრიალი„ (1986); „ცისფერი მთები, ანუ
დაუჯერებელი ამბავი“- (1983); „სინემა“ - (1977); დოდო,
გურამის ცოლი - „შეწყვეტილ სიმღერაი“ - (1960); ეთერი -
„ნინო“ (1959); ნინო - „ბაში-აჩუკი“ (1956); მზია -
„ცისკარა“ (1955); თინა - „ჭრიჭინა“ (1954);
ეთერი - „ბედნიერი შეხვედრა“ (1949);
ქეთევანი - „დავით გურამიშვილი“ (1946);
--------------------------------------------------------------------
30-მდე როლი ითამაშა თეატრში, მათ შორის: ივდითი
- „ურიელ აკოსტა“, ხათუნა - „ჯარისკაცის ქვრივი“,
ვარვარა კარპოვნა - „ეზოში ავი ძაღლია“, მედეა -
„მედეა“, ლედი ანა - „რიჩარდ მესამე“, ტუფია -
„უბედურება“, გრაფინია ვრონსკაია - „ანა კარენინა“,
მზევინარი - „მოკვეთილი“, ანა ბატონიშვილი -
„მეფე ერეკლე“, ზოია ვასილევნა -„ლამაზი მამაკაცი“,
თინათინი - „რაიკომის მდივანი“, მზევინარი - „გიორგი
სააკაძე“, შირინი -„ლეგენდა სიყვარულზე“,
ხათუნა - „მთვარის მოტაცება“...
Негізгі бет „მონატრება“ - დოდო ჭიჭინაძე (გადაცემის ავტორი დავით ბეჟიტაშვილი, „ოკრიბა-ტვ“, 1999 წელი)
Пікірлер