بابا وحشني
يمكن يبقى الموضوع متعاد والجملة بسيطة ومتقاله
بس معنديش غيرها بيتقال علشان يوصف صدق الحاله
بابا وحشني
عاوز اخش البيت واسلّم
من غير ولا ارد ولا أتكلم
والاقيه بيخبط على بابي وبيقول مالك
عاوز اسمعه بيقول بحنان
ادخل اوضتك على طول علشان
فيه حاجه جميلة جايبهالك
عاوز امدد جسمي شويه
من اغير ولا هم ولا اذيه
متطمن لوجوده معايا
ومهوّن عن روحي شوية
كنت صغير متحمس للدنيا بغشمي
ومصدق في الخلق بعشمي
وفاتح صدري وعامل عفريت
فاكر ان وجوده دباجه
وبإنه لاشايل ولا حاجه
وبإن الأب حكاوي وصيت
بعد ما ابويا اتوفى بلحظة
شوفت حقيقة الدنيا اتخضيت
أدركت ساعتها بانه عظيم
وازاي دفع التمن الغالي
والدي اللي مسدد جرح أليم
أقساط علشان راحة بالي
بعد وفاته بلحظة اتهزيت والناس على حقيقتهم ظهروا
الباب اللي بييجي الريح منه اتضح انه ساده بضهره
واما الواقع بصلي بعنيه
وصحيت من ظني وفقت عليه
المشهد من فزعه رعشني
بابا وحشني
شايفه بيعمل عشا ف المطبخ
شايفه بيشرب شاي ف الصاله
شايفه مخرج من جيبه فلوس
وحاططها ف خرم الحصاله
شايفه مدمع من غير مايقول
شايفه مسلّم لله على طول
راجع من شغل اليوم مقتول
يلعن ف الايد البطاله
طلعت دنيتي اتقلب كتير م اللي انا كنت بشوفه الأول
طلعت ورزله وبايخه وكابوسها مكمل ومطوّل
أوقات بستغرب على ابويا كان عايش مستحملها ازاي ؟
الواحد لسه ف سن شباب
وبتكسر فيه اتفه أسباب
مجروح علشان سايب متساب
مستتقل لحظة ف عمره الجاي
ازاي كان عايش بالسكر وماخدش علاج
وازاي بالضغط وعمره ماقاس
وازاي رغم الدخان عارف
مايحسسناش ضيق الانفاس
وازاي عمره ماقرر يهرب
وازاي عمره ماقرر يرتاح
وازاي بيطير بينا ومكسور
جربها ازاي بجناح وجناح ؟
شايفه مطبطب شايفه مداوي
جيبه الفاضي جراب الحاوي
شايفه بيصبر ويعاشر
الشين والدون والبراوي
شايفه ف عز الفقر شياكه
اشيك واحد وسط العيله
شايفه البطل الصلب الصابر
اللي ماسابش ف مره الشيله
شايله لحد مانزلته بايدي
يحضن مثواه ف اسود ليله
وشايفني بامدد جنبه انام لولا ان فيه راجل قام حاشني
بابا وحشني
كان احسن واحد يقرى الناس
ويفّطمني
عمره ماقلل من احلامي ولا قّطمني
اغلط يعذر
اسقط يصبر
ويقول كمّل
ربنا يرزقه رحمه وغفران على ماقد آمن واتحمّل
حتى ف مرضه ماطوّلش وغاب
راجل نسمه
رحمه وبسمه
راضي القسمه
وراضي الأسباب
دلوقتي بقيت وسط العالم مسحول على واحد يسمعني
شوف كام مليار جوه العالم ومافيش فيهم حضن يساعني
بابا اتوفّي
بعد ماكفّى
بعد ما صحح سير الدفهّ
وانا عارف انه ف دار الحق
وبيحيي ف عالم طبعه ارّق
انا راضي غيابه ماقولتش لا
انما صمت فراقه دوشني
عامل زيه ف كل طباعه
والفرق مابيننا كإنه مافيش
كل اللي بيعرف ابويا
لو شافني يقول احمد مامشيش
نسخه ف حاله
نسخه ف باله
شعره ولونه
طبعه وكونه
عصبيته والمه وترحاله
بافتكر الجدل اللي مابيننا وازاي مره اتعصبت عليه
وباقول ادفع عمري الباقي واقعد تحت أوامره ورجليه
الراجل ابويا ده اعظم اب
حتى النسيان مايجوزش عليه
اخر لحظه ف عمره نظرلي وقالي اتأنى
وانا دمعي اللي مغرق لبسه كان نفسه يقول بس استنى
واللي مصبرني ف نار الدنيا
ظني ف انه عزيز ف الجنه
مرتاح من المه وعلى صبره
وبيجني الدعا من ليل قبره
ربنا رحمن حبه اختبره
ورزقني تاريخ عشته وعاشني
بابا وحش
Негізгі бет عمرو حسن | بابا وحشني للمرة الأولى
Пікірлер: 97