နေ့စဉ်ဝတ်ပြုခြင်းအလင်းပြ
“ကတိတော်ကိုပြန်လည်သတိရလျှက် ဆုတောင်းသံများကို အဖြေပေးတော်မူပါ။”
" Lord, remember your promise and answer our prayers.”
အဓိကအချက် - ဆာလံ (၇၄) မှခွန်အားယူစရာများ၊ ဆဌမနေ့(နောက်ဆုံး)
ဖတ်ရန်ကျမ်းချက် - ဆာလံကျမ်း၊ ၇၄း၁၈-၂၃
“ကိုယ်တော်၏ချိုးငှက်အသက်ကို သားရဲ၌ အပ်တော်မမူပါနှင့်။ ကိုယ်တော်၏ ဆင်းရဲသားတို့ အစည်းအဝေးကို အစဉ်မေ့လျော့တော်မမူပါနှင့်။” (ဆာလံ၊ ၇၄း၁၉)
ဘုရားသခင်ရဲ့ တုနှိုင်းမဲ့တန်ခိုးတော်ကို ကြေငြာပြီးနောက်၊ ဆာလံဆရာက သူ့ရဲ့ရန်သူတွေရဲ့အခြေအနေကို ဆက်လက် ဖော်ပြပါတယ်။ သူတို့တွေဟာ ဘုရားကိုဆန့်ကျင်ဘက်ပြုကြတဲ့လူတွေဖြစ်တယ်။ ထာဝရဘုရားကို ကဲ့ရဲ့ကြတယ်၊ နာမတော်ကိုမထီမဲ့မြင်ပြုကြတဲ့ မိုက်မဲသောသူများသာဖြစ်ကြတယ်။ အဲ့ဒီလိုလူတွေလက်ထဲကို ကိုယ်တော်ရဲ့ချိုးငှက် နဲ့တူတဲ့ သူတို့လိုလူတွေကို ဘုရားသခင်ကွယ်ကာဖို့၊ သားရဲတိရိစ္ဆာန်နဲ့တူတဲ့ ရန်သူတွေလက်ထဲကို မအပ်လိုက်ဖို့ ဆက်လက်တောင်းလျှောက်ပါတယ်။ ၎င်းတို့၏ စိတ်နေစိတ်ထားနှင့် အခြေအနေများ ပုံစံတူနေသောကြောင့် ချိုးငှက်နှင့် နှိုင်းယှဥ်ထားပါတယ်။
ချိုးငှက်များသည် ရိုးသားတယ်၊ အန္တရာယ်ကင်းတယ်၊ နူးညံ့သိမ်မွေ့လျှက် သစ္စာရှိ၍ ဒဏ်ရာရချိန်မှာ ညည်းတွားမြည်တမ်းကာ မိမိကိုယ်ကို ခုခံကာကွယ်နိုင်ခြင်း မရှိသောကြောင့် ဖြစ်သည်။ “ဘုရားသခင်၏ဆင်းရဲသားလူအစုအဝေး” သည် ရက်စက်ကြမ်းကြုတ်သောသုံ့ပန်းအဖြစ်သို့ သယ်ဆောင်သွားခြင်း သို့မဟုတ် ပင်ပန်းနွမ်းနယ်ပြီး လူဆိတ်ညံသောပြည်တွင် ကျန်ရစ်ခဲ့သော အကြွင်းအကျန်အဖြစ်-ဘုရားသခင်၏ ကာကွယ်မှုနှင့် “အောက်မေ့ခြင်း” များစွာလိုအပ်ကြောင်းဆက်လက်ဖော်ပြပါတယ်။
ဆက်လက်ပြီးဘုရားသခင်ရဲ့ ပဋိညာဥ်တော်ကိုကိုင်ဆွဲပြီး ဘုရားသခင်ဘက်က ပဋိညာဥ်တော်ကို ထောက်ရှုဖို့ အသနားခံ ပါတယ်။ “ဘုရားသခင်၏ပဋိညာဉ်” သည် အာဗြဟံ၊ ဣဇာက်၊ ယာကုပ်တို့နှင့် ဖွဲ့ထားခြင်းဖြစ်ပြီး ထိုသူတို့၏သားစဉ် မြေးဆက် အား “ခါနန်ပြည်ကိုအမွေခံများ” အဖြစ်အာမခံခဲ့သည်။ ယခုဘုရားသခင်အား ထိုပဋိညာဥ်ကိုအောက်မေ့ဖို့ ယခုဖြစ်နေသောအရာများသည် ပဋိညာဥ်နှင့်ဆန့်ကျင်ဘက်များဖြစ်နေကြောင်းတင်ပြတယ်။ နေရာတကာမှာ မတရားမှုတွေကြီးစိုးနေပြီး မှောင်မိုက်လောကမှာ လုယူခြင်း၊ ညှဥ်ဆဲခြင်းများနဲ့ပြည့်နေတယ်။ နှိပ်စက်ခံနေရသော သူတွေအတွက်လည်း ဆက်လက်ဆုတောင်းပေးနေရတယ်။ အထူးသဖြင့်သူတို့တွေ စိတ်မပျက်သွားဖို့ အရှုံးမပေးသွားစေဖို့ ဆုတောင်းပေးတယ်။
နောက်ဆုံးမှာတော့ ဆင်းရဲဒုက္ခရောက်တဲ့သူတွေ၊ ငတ်မွတ်တဲ့သူတွေလည်း ဘုရားသခင်ရဲ့နာမတော်ကိုချီမွမ်းကြဖို့ တိုက်တွန်းထားတယ်။ ဆင်းရဲခြင်း၊ ငတ်မွတ်ခြင်းတွေက ဘုရားသခင်ကိုချီးမွမ်းတာကို ရပ်တန့်မသွားစေဖို့ ဆာလံဆရာ အလိုရှိပါတယ်။ ဘယ်လိုအခြေအနေတွေမှာပဲရှိရှိ ဘုရားလူတွေသည် ဘုရားသခင်ကိုမမေ့သွားဖို့ ဘုရားသခင်ကိုဆက်လက် ချီးမွမ်းနေဖို့ ဖြစ်ပါတယ်။ ဘုရားသခင်ဘက်ကလည်း လုပ်စရာရှိတာဆက်လုပ်နေကြောင်းကို ယုံကြည်နေဖို့ လည်းလို ပါတယ်။ ဘုရားသခင်က ကိုယ်အမှုကို ကိုယ်တိုင်စီရင်ဖို့ နိုးထပြီးလုပ်သင့်တာတွေလုပ်ဖို့ အသနားခံပါတယ်။
လူမိုက်တွေထိခိုက်နာကျင်စေတဲ့အထဲမှာ ဘုရားသခင်ရဲ့နာမတော်လည်းပါနေကြောင်း၊ ရန်သူတွေရဲ့ ကဲ့ရဲ့တဲ့အသံကို ဘုရားသခင်ကိုယ်တိုင် စီရင်ဆုံးဖြတ် တော်မူမည်အကြောင်း တောင်းလျှောက်ပြီး ဆာလံ ၇၄ ကိုအဆုံးသတ်ထားပါတယ်။
ဆင်ခြင်ရန် - ဘယ်လိုအခြေအနေတွေမှာပဲရှိရှိ ဘုရားလူတွေသည် ဘုရားသခင်ကိုမေ့မသွားဖို့ ဘုရားသခင်ကိုဆက်လက် အသနားခံ တောင်လျှောက်နေဖို့၊ ဘုရားသခင်ရဲ့နာမတော် ချီးမွမ်းနေဖို့ ဖြစ်ပါတယ်။
ဆုတောင်းခြင်း - ကိုယ်တော်ရဲ့ လူစုလူဝေးသည် ဆင်းရဲဒုက္ခ၊ ညဥ်းဆဲခြင်း၊ ငတ်မွတ်ခြင်း၊ အနိုင်ကျင့်ခြင်း၊ လုယူခြင်းတွေကိုခံနေရပါတယ်။ ဘုရားနဲ့ဆန့်ကျင်ဘက် အဓမ္မလူများသည် ဘုရားသခင်နာမတော်ကို ရှုတ်ချနေကြတာ ကို ဘုရားသခင်သိမှတ်လျှက် ဆုံးမဒဏ်ခတ်တော်မူခြင်းအားဖြင့် တရားဓမ္မဘက်မှလူများကို ကယ်နုတ်တော်မူပါ။ အာမင်
Негізгі бет နေ့စဉ်ဝတ်ပြုခြင်းအလင်းပြ၊ ဆာလံ (၇၄) မှခွန်အားယူစရာများ၊ ဆဌမနေ့(နောက်ဆုံး)
No video
Пікірлер