Otalar yig'lamas
Har bitta farzanddan so'rasangiz gar,
Bu jiddiy masala yolg'on ko'zlamas.
Guvoh bo'lganmikan hechda bir safar,
Onalar yig'lar lek, ota yig'lamas.
Xattoki vatanda urush bo'lsa ham,
Qoʻrquv begonadir aslo chekinmas.
Oilasin o'ylaydi har doim bardam,
Osmon yigʻlaydi lek, ota yig'lamas.
Eng yaqin doʻstlari ketsinlar tashlab,
Po'lat sinsa sinar, bardoshi sinmas.
Isrofil ko'rinib surini ushlab,
Qiyomat kelmasa, ota yig'lamas.
Tuyular baʼzida hayoti nursiz,
Bolasi kasalmand, tunlar uxlamas.
Ogʻriq kuchli boʻlsada, Qolsada pulsiz,
Otalar yig'lamas, ota yig'lamas.
Dardlari koʻp erur, bolsa ham alam,
Toʻsatdan tolsa gar, turolmay qolmas,
Kechalari bir o'zi yolg'iz qolsa ham,
Botini yig'laydi, zohir yig'lamas.
Bunday otalar koʻp, misollar talay,
Ular ham insondir lek aldar nigoh,
Buni xohlamasdim, lekin harqalay,
Men ul hodisaga bo'lganman guvoh.
Keling so'zlab beray kelmasada xush,
Yarim tun chamasi soat ikkilar.
Uyqu shirin edi uyg'ondim xomush,
Onam der: tur bolam buving o'tdilar.
O'rnimdan turdimda oldim tahorat,
Boʻlsada harorat, ahvolim yomon.
Yo'l oldim, tushunmay bu qanday xolat,
Dadamning bolalik xovlisi tomon.
Yo'llarim xiradur, ko'zlarimda nam,
O'smir paytim edi, edim 15 yosh.
Butun urugʻ yigʻilgan farzandlari jam,
Buvim jonsiz yotar, Otam ko'zi yosh.
Xayollar miyamni tashlar kemirib,
Bu ilk koʻz yoshlar oxiri balkim.
Nedir nadomat bu 50 ga kirib,
Ushlolmadi yigʻisin katta amakim.
Otam ham yig'larkan, bo'larkan xomush,
Axir u ham inson, unda ham bor dil.
Onani ko'mishdir eng og'ir yumush.
Hech ham jilmaymadi otam o'sha yil.
O'zin qonuni bor ushbu dunyoni,
Abadiy saqlanur uning bisoti.
Po'latdanda qattiq o'sha bardoshni,
Parchalab tashladi ona vafoti.
Hamma ham o'limga bitta da'vogar,
Hammasi to'g'rida o'ylasak obdon.
Yo tentak, yo jinni bo'lmasa agar,
Onasi o'lsa ham yig'lamas nodon.
Bu she'r otalarga atalgan edi,
Tasdiqlab turardi ularning ko'zi.
Ichimda bir ovoz jilmayib dedi,
Onalar emasmi jannatning o'zi.
Baribir javobsiz qolmadi savol,
Shirin Xayot erur go'yo tugamas.
Qayerda bo'lmasin qandayin ahvol,
Onasi bolsa bas, Ota yig'lamas.
✍️Iskandar Xamraqulov
🎙Shahina Bahodirova
Негізгі бет Onalar yig'lar lek, ota yig'lamas
Пікірлер: 1