***
Осиё,
ахир, мен -
салкам бир осий,
Ўзимни айблаб яшайман токай?
Келсанг, бу гуноҳкор дилимни осиб,
Келсанг, кўзларингга ёшимни тўкай...
Томримда қон эмас,
ҳирс оқди гоҳи,
Гоҳида беркинмай
турди эҳтирос -
Чарсиллаб, чарсиллаб ёнди хобгоҳим,
Менинг бу оловдан қўрқмаганим рост.
Ҳалиям бошимга
қўнмади ҳумо,
Ҳали мос келмади
исмим жисмимга...
Ҳали тарк этмади кўнглимни гумон,
Ҳалиям зордирман бир тишлам мумга.
Осиё,
ахир, мен -
салкам бир осий,
Ўзимни айблаб яшайман токай?
Келсанг, бу гуноҳкор дилимни осиб,
Келсанг, кўзларингга ёшимни тўкай.
Бир сўз айт,
сен менга халоскор сўз айт,
Қайтган йўлларига
ким қайта борган?
Одамлар дорлардан қочаётган пайт,
Одамлардан қочиб, кетяпман дорга...
19.09.2021
Ҳумоюн Фаттоҳ
Негізгі бет "Osiyo, axir, men - salkam bir osiy..." - Humoyun Fattoh | Firdavs Shokirxoʻja oʻqidi
Пікірлер