Bitbit ang white flag ay sinalubong ng libong Gapawenyo ang pagdating ng mga labi ng beteranong brodkaster na si Jose Malgapo Taruc Jr o mas kilala sa tawag na Manong Joe Taruc sa kanyang tahanan sa Lungsod ng Gapan.
Mula Maynila ay iniuwi noong Huwebes, October 5, 2017 ang mga labi ng itinuturing na “anak ng Gapan” sa lalawigan ng Nueva Ecija.
Ayon sa panganay na anak nito na isa ding mamamahayag na si Jay Taruc, matapos mabigyan ng pagkakataon na makapagpaalam kay Manong Joe ang malalapit na kaibigan at naging katrabaho nito ay iniuwi nila ito sa probinsya upang sa huling pagkakataon ay muli itong masilayan ng mga kababayang Novo Ecijano.
Maituturing bilang isa sa mga haligi ng industriya ng pamamahayag si Manong Joe Taruc dahil sa paghahatid ng mga makatotohanan at patas na balita sa loob ng apat napu’t syam na taon.
Sinabi ni Jay na isa sa maipagmamalaki ng pamilya Taruc ay ang walang bahid na korapsyon na pagsisilbi sa bayan ng kanilang ama.
Aminado din si Jay Taruc na balot pa rin ng kalungkutan ang kanilang pamilya sa pagkawala ni Manong Joe ngunit sa kabila nito ay nananatili aniya nilang ipinagmamalaki ang kanilang ama dahil sa hindi matatawarang ambag nito sa lipunan.
Sa panayam naman kay Gapan Vice Mayor Inocencio Bautista, sinabi nito na nagpasa ng isang resolusyon ang Sangguniang Panlungsod bilang pagkilala sa ambag ni Manong Joe at pakikiramay sa pamilyang naulila nito.
Kabilang din sa labis na nagdadalamhati sa pagkawala ni Manong Joe ay si Grace Sansano, DZRH Correspondents ng Nueva Ecija na itinuring ng anak nito.
Aniya hindi lamang simpleng boss ang naging papel ni Manong Joe sa kanyang buhay kundi labis pa doon, na siyang nagbigay ng kalakasan ng loob, tiwala sa kanyang sarili at inspirasyon sa paghahatid ng makabuluhang balita.
Samantala, dumagsa ang mga padalang bulaklak sa burol ni Manong Joe mula sa mga personalidad at politiko bilang pakikidalamhati at pakikiramay sa pagkawala nito.
Isa din sa mga sumalubong sa pagdating ng mga labi ni Manong Joe ang “Boses ng Katotohanan” Philip “DobolP” Piccio at ilang kaanak ng pamilya Taruc.
Dumating at nakiramay din sina Former Governor Aurelio Matias Umali, Governor Czarina Umali, Cabanatuan Vice Mayor Anthony Umali, Bokal Macoy Matias at iba pang mga Punong Bayan sa lalawigan.
Nagpahatid ng pakikiramay si Vice Mayor Umali sa pamilya Taruc, na nagsabing hindi matatawaran at magsisilbing inspirasyon sa mga Novo Ecijano ang mga nagawa ni Manong Joe sa larangan ng broadcasting.
Namayapa si Manong Joe sa edad na pitumpu’t isa dahil sa komplikasyon sa puso at naulila nito ang kanyang asawa, apat na anak at walong apo.-Ulat ni Jovelyn Astrero
Негізгі бет Pagdating ng mga labi ni Manong Joe Taruc sa Lungsod ng Gapan, sinalubong ng libong kababayan nito
Пікірлер: 19