People's Spring | ထိုင်းဟိုတယ်မှာ ဗီယက်နမ် ၆ ဦးသေဆုံးမှု ပဟေဠိ ဖြစ်နေ
People's Spring
ထိုင်းနိုင်ငံက ကြယ်ငါးပွင့် ဟိုတယ်မှာ ဗီယက်နမ် ၆ ဦး အစုလိုက် သေဆုံးခဲ့တဲ့ ဖြစ်စဉ်မှာ ရှုပ်ထွေးမှုတွေ၊ ပဟေဠိတွေ ရှိနေဆဲလို့ စုံစမ်းရေး အရာရှိတွေက ပြောပါတယ်။
ထိုင်းရဲတပ်ဖွဲ့ဟာ ဟိုတယ် ဝန်ထမ်းတွေရဲ့ ဆက်သွယ် တိုင်ကြားမှုအရ ဇူလိုင် ၁၆ ရက် ညနေပိုင်းက Grand Hyatt Erawan ဟိုတယ်ကို သွားရောက် စစ်ဆေးရာမှာ ပဟေဠိဆန်ဆန် အစုလိုက် သေဆုံးနေသူ ဗီယက်နမ် အမျိုးသား ၃ ဦးနဲ့ အမျိုးသမီး ၃ ဦးကို သူတို့ငှားရမ်းထားတဲ့ အခန်းထဲမှာ ရှာတွေ့ခဲ့တာ ဖြစ်ပါတယ်။
အဲဒီထဲက ၂ ဦးဟာ အမေရိကန် နိုင်ငံသား ခံယူထားသူတွေပါ။
အစောပိုင်းက ဟိုတယ်မှာ ပစ်ခတ်သံတွေ ကြားခဲ့တယ်ဆိုတဲ့ ကောလာဟလတချို့ ထွက်ပေါ်ခဲ့ပေမယ့် ရဲတွေကတော့ သေဆုံးမှု အားလုံးဟာ အဆိပ်မိတာကြောင့်လို့ ကောက်ချက်ချခဲ့ပါတယ်။
ထိုင်းဝန်ကြီးချုပ် ဆရက်သာ သာဗီဆန်ကိုယ်တိုင် အခင်းဖြစ်ရာ ဟိုတယ်ထိ ရောက်လာပြီး ရဲတွေနဲ့ တွေ့ဆုံခဲ့ပါတယ်။
ရဲတွေက ရှာတွေ့တဲ့အချိန်မှာ ဗီယက်နမ် ၆ ဦးရဲ့ သေဆုံးပြီးချိန် ၂၄ နာရီလောက် ကြာခဲ့ပြီးပြီလို့ ယူဆခဲ့ကြောင်း၊ သေမှုသေခင်းဆိုင်ရာ ရင်ခွဲစစ်ဆေးမှု မှတ်တမ်းတွေကိုတော့ ဆက်လက် စောင့်ဆိုင်းနေဆဲဖြစ်ကြောင်း ဆရက်သာက ဆိုပါတယ်။
ထိုင်းဝန်ကြီးချုပ်က အခုဖြစ်ရပ်ဟာ လုပ်ကြံမှု တစ်ခုရဲ့ ရလဒ်လို့ ပြောကြားခဲ့ပြီး ကိုယ့်ကိုယ်ကိုယ် အဆုံးစီရင်ကြတာ မဟုတ်ဘူးလို့လည်း ပြောကြားသွားပါတယ်။
Grand Hyatt Erawan ဟိုတယ်ဟာ ဘန်ကောက်ကို လာရောက်တဲ့ ကမ္ဘာလှည့် ခရီးသွား ဧည့်သည်တွေကြား ထင်ရှားတဲ့ ဟိုတယ်တစ်ခု ဖြစ်ပါတယ်။
ဝန်ကြီးချုပ် ဆရက်သာကတော့ အခုဖြစ်ရပ်ကြောင့် ထိုင်းနိုင်ငံရဲ့ ကမ္ဘာလှည့် ခရီးသွားလုပ်ငန်းနဲ့ နိုင်ငံပုံရိပ်တွေကို ထိခိုက်မှာ မဟုတ်ဘူးလို့ ပြောပါတယ်။
စုံစမ်းမှုတွေအရ သေဆုံးသူ ဗီယက်နမ် ၆ ဦးဖြစ်ပေမယ့် အခန်းမှာ နေထိုင်တာ ၇ ဦး ဖြစ်နေပြီး ဟိုတယ်မှာ Check in ဝင်ထားသူကတော့ ၅ ဦးပဲ ရှိပါတယ်။
ဒါကြောင့် ၁ ဦး ပျောက်ဆုံးနေဆဲ ဖြစ်သလို သေဆုံးနေသူတွေထဲက ၁ ဦးကလည်း ဟိုတယ်မှာ စာရင်းသွင်းထားတဲ့ အချက်အလက်တွေနဲ့ ကိုက်ညီမှု မရှိပြန်ပါဘူး။
သေဆုံးနေသူတွေဟာ ဟိုတယ်ကနေ Check outလုပ်ဖို့ ရည်ရွယ်ဟန်နဲ့ ခရီးဆောင် အိတ်တွေကို အသင့်ပြင်ဆင်ထားခဲ့တာ တွေ့ရပြီး အနားမှာ မှာယူထားတဲ့ အစားအသောက်တွေကိုလည်း တွေ့ရပါတယ်။
ရဲတွေ ရှာတွေ့ချိန်မှာ အစားအသောက်တွေက ပလတ်စတစ် အစွပ်တွေတောင် မဖယ်ရသေးတဲ့ထိ အရာမယွင်း ရှိနေပေမယ့် ရေချိုးခန်းထဲမှာတော့ ဖွင့်သောက်ထားတဲ့ လက်ဖက်ရည်တွေ၊ စွမ်းအားဖြည့် အချိုရည်တွေ၊ ပျားရည် သံဘူးတွေကို တွေ့ခဲ့ရပါတယ်။
စုံစမ်းမှုတွေအရ အဲဒီနေရာမှာ ခိုက်ရန်ဖြစ်ထားတာ၊ ဓားပြတိုက်ခံထားရတာမျိုး လက္ခဏာတွေ မတွေ့ခဲ့ရပါဘူး။
သေဆုံးသူတွေထဲက ၂ ဦးဟာ အဆိပ်မိနေတဲ့ အချိန်မှာ ဟိုတယ်ခန်း တံခါးဆီ သွားရောက်ဖို့ ကြိုးစားရင်း မအောင်မြင်ခဲ့တဲ့ အထောက်အထားမျိုး တွေ့ရပါတယ်။
အမေရိကန် နိုင်ငံခြားရေးဝန်ကြီးဌာနက အခုကိစ္စနဲ့ ပတ်သက်တဲ့ စုံစမ်းမှုတွေကို အနီးကပ် လေ့လာ စောင့်ကြည့်မယ်လို့ ကြေညာခဲ့သလို ထိုင်းနိုင်ငံဆိုင်ရာ ဗီယက်နမ်သံအမတ်ကြီးကလည်း စုံစမ်းစစ်ဆေးမှုတွေမှာ ကူညီပေးမယ်လို့ ပြောထားပါတယ်။
#ludunwayoo #လူထုနွေဦး #NewsUpdate
𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 - / @peoplespring
𝗙𝗮𝗰𝗲𝗯𝗼𝗼𝗸 - / ludunwayoo
𝗪𝗲𝗯𝘀𝗶𝘁𝗲 - www.ludunwayoo...
𝗜𝗻𝘀𝘁𝗮𝗴𝗿𝗮𝗺 - / ludunwayoo
𝗧𝗲𝗹𝗲𝗴𝗿𝗮𝗺 - t.me/peoplespring
Негізгі бет People's Spring | ထိုင်းဟိုတယ်မှာ ဗီယက်နမ် ၆ ဦးသေဆုံးမှု ပဟေဠိ ဖြစ်နေ
No video
Пікірлер: 11