ကျည်တစ်တောင့်ကြောင့် ပြောင်းလဲသွားနိုင်တဲ့ အမေရိကန်ရဲ့ အနာဂတ်
အမေရိကန် ရွေးကောက်ပွဲမှာ ဘယ်သူ အနိုင်ရမလဲ ဆိုတဲ့ မေးခွန်းကို ဘယ်သူမှ တစ်ထစ်ချ ယုံကြည်ချက် ရှိရှိနဲ့ အဖြေပေးရဲမှာ မဟုတ်ပါဘူး။ ဒါပေမဲ့ အဲဒီ အခြေအနေဟာ သီတင်းပတ် တစ်ခုတာ ကာလအတွင်းမှာ ရုတ်တရက် ပြောင်းလဲသွားပါတယ်။ လက်ရှိ သမ္မတ ဂျိုးဘိုင်ဒန်ဟာ သူ့ရဲ့ ပါတီတွင်းမှာတောင် ထောက်ခံနှုန်း ကျဆင်းလာနေပြီး ထရမ့်ကို ယှဉ်နိုင်ခြေ မရှိတာကြောင့် ရွေးကောက်ခံ ပုဂ္ဂိုလ် အဖြစ်က နုတ်ထွက်ပေးဖို့တောင် ဖိအားပေး ခံနေရတယ်။ တစ်ဖက်မှာတော့ သေဘေးနဲ့ နီးလွန်းတဲ့ လုပ်ကြံမှု တစ်ခုကို မျက်ဝါးထင်ထင် ကြုံတွေ့ခဲ့ခြင်းနဲ့အတူ ဒေါ်နယ်လ်ထရမ့်အပေါ် လူကြိုက်များမှုဟာ တဟုန်ထိုး မြင့်တက်လာခဲ့ပါတယ်။
စိတ်ရူးထတဲ့ လူငယ်တစ်ဦးရဲ့ သေနတ်ပြောင်းကနေ ပစ်လွှတ်လိုက်တဲ့ ကျည်ဆန်ဟာ အမေရိကန် ရွေးကောက်ပွဲရဲ့ အလားအလာ၊ ပြီးတော့ အမေရိကန် နိုင်ငံ တစ်ခုလုံးရဲ့ အနာဂတ်ကိုပါ လမ်းကြောင်း ပြောင်းသွားစေခဲ့တာ ဖြစ်ပါတယ်။ ဇူလိုင် ၁၃ ရက်နေ့တုန်းက ပင်ဆယ်လ်ဗေးနီးယား ပြည်နယ်က မဲဆွယ် ဟောပြောပွဲမှာ အသက် ၂၀ အရွယ် သောမတ်စ် မက်သရူးစ် ခရွတ်စ်ခ်ဟာ အိမ်ခေါင်မိုးပေါ်ကနေပြီး ထရမ့်ကို ချောင်းမြောင်း ပစ်ခတ်ခဲ့ပါတယ်။ သူ့လက်ချက်ကြောင့် ထရမ့်ကို ထောက်ခံ အားပေးတဲ့ လူစုလူဝေးထဲက အမျိုးသား တစ်ဦးသေဆုံးပြီး၊ တခြား နှစ်ယောက် အပြင်းအထန် ဒဏ်ရာ ရသွားခဲ့ပါတယ်။ ထရမ့်ကိုယ်တိုင်ကလည်း နားထင်နားမှာ ကျည်ဆန် ရှပ်မှန်တဲ့ ဒဏ်ရာ ရခဲ့တယ်။ ထရမ့်က သူဟာ ကံကြီးလွန်းလို့ မသေခဲ့တာ ဖြစ်တယ်လို့ ဝန်ခံခဲ့ပါတယ်။ သေနတ်သမားကို လျှို့ဝှက်အေးဂျင့် လုံခြုံရေး တပ်ဖွဲ့ဝင်တွေက သုတ်သင် ရှင်းလင်းခဲ့ပါတယ်။ အခုလို လက်ရဲဇာတ်ရဲ လုပ်ကြံမှုမျိုးကို ခရွတ်စ်ခ်က ဘာကြောင့် ကျူးလွန်ခဲ့သလဲ ဆိုတာကိုတော့ FBIထောက်လှမ်းရေး ဌာနက ဦးဆောင်ပြီး အပူတပြင်း စုံစမ်းနေဆဲပါပဲ။
အဲဒီ ပစ်ခတ်မှု မတိုင်ခင် အခြေအနေတွေကို ပြန်ကြည့်မယ်ဆိုရင် ထရမ့်ဟာ သူ့အပေါ် ထောက်ခံသူတွေကလွဲရင် ပါတီစွဲ မရှိတဲ့ မဲဆန္ဒရှင်တွေ အမြင်မှာ နှာခေါင်းရှုံ့ချင်စရာ အနေအထားတွေ အများကြီး ရှိခဲ့တယ်။ ထောင်မကျပေမယ့် ရာဇဝတ်ကြောင်း စွပ်စွဲချက်တွေမှာ ပြစ်မှုထင်ရှားကြောင်း တရားစီရင်ချက်တွေ ချမှတ် ခံထားရတယ်။ ဘိုင်ဒန်ရဲ့ ဒီမိုကရက် ပါတီဖက်က ထရမ့်ကို ရာဇဝတ်သား တစ်ယောက်လို့ ပုံဖော်ပြီး လှောင်ပြောင်တာ၊ ထိုးနှက်တာတွေတောင် ရှိခဲ့တယ်။ ဒါပေမဲ့ အဲဒီ ရာဇဝတ်သားအဖြစ် ပုံဖော်ခံရသူကပဲ လုပ်ကြံမှုနဲ့ ကြုံအပြီး အာဇာနည်တစ်ယောက်၊ သူရဲကောင်း တစ်ယောက်လို ဖြစ်သွားပါတယ်။ သူ့ကို အားပေး ထောက်ခံသူတွေက ထရမ့်ကို ပိုပြီး ခိုင်ခိုင်မာမာ အားပေးလာသလို အလယ်အလတ် အမြင်ရှိတဲ့ ပြည်သူတွေဆီက ကရုဏာမဲတွေကိုလည်း သိမ်းကြုံးယူနိုင်မယ့် အလားအလာ များသွားပါတယ်။
အစောပိုင်းတုန်းက ထရမ့်ဟာ အဲဒီ လုပ်ကြံမှုကို ဟန်ဆောင်ပန်ဆောင် ဖန်တီးယူပြီး သူ့ရဲ့ ပုံရိပ်ကို တည်ဆောက်တယ် ဆိုတာမျိုး ထင်ကြေး သီအိုရီဆန်ဆန် ဝေဖန် သုံးသပ်ချက်တွေ ရှိခဲ့ပါသေးတယ်။ ဒါပေမဲ့ ရှုထောင့်ပေါင်းစုံက ရိုက်ကူးထားတဲ့ ဓာတ်ပုံနဲ့ ဗီဒီယို မှတ်တမ်းတွေကို ပြန်လည် ဆန်းစစ်ကြည့်တဲ့ အခါမှာတော့ ထရမ့်ဟာ တကယ့်ကို ရည်ရွယ်ချက်ရှိရှိ ပစ်မှတ်ထား လုပ်ကြံ ခံခဲ့ရတယ် ဆိုတာက ငြင်းမရအောင် ထင်ရှားလာပါတယ်။ မြင်သာအောင် ပြောရရင် မူဝါဒအရ ထရမ့်ကို ဆန့်ကျင် ရပ်တည်တဲ့ New York Timesလို သတင်းဌာနကြီးရဲ့ ဂျာနယ်လစ် ကိုယ်တိုင် ရိုက်ကူးထားတဲ့ ဓာတ်ပုံမှာပါ ကျည်လမ်းကြောင်းဟာ ထရမ့်ရဲ့ ခေါင်းနဲ့ နီးနီးကပ်ကပ် ဖြတ်သန်းနေတာမျိုးကို တွေ့ခဲ့ရပါတယ်။
ရွေးကောက်ပွဲဝင်မယ့် ပုဂ္ဂိုလ်တစ်ယောက်ကို လုပ်ကြံတယ်ဆိုတဲ့ သတင်းဟာ အမေရိကန် တစ်နိုင်ငံလုံးကို ချက်ချင်း ပျံ့နှံ့သွားတယ်။ ပါးနပ်တဲ့ နိုင်ငံရေးသမား တစ်ယောက်ပီပီ ကြောက်စရာ အကောင်းဆုံး အချိန်မျိုးမှာတောင် ထရမ့်ဟာ အကြမ်းဖက်မှုကို ဖီဆန် အံတုတဲ့ ပုံရိပ်ကို ပြသသွားတယ်။ သူ့ကို ထောက်ခံသူတွေက ‘Fight Fight Fight’လို့ ကြွေးကြော်နေချိန်မှာ မျက်နှာ ညာဖက်တစ်ခြမ်း သွေးတွေရွှဲနေတဲ့ ထရမ့်က လက်သီးလက်မောင်း တန်းရင်း သူ့ရဲ့ မာကျောမှုကို ပြသနေတဲ့ ဓာတ်ပုံဟာ အကောင်းဆုံး ဝါဒဖြန့် ကိရိယာ တစ်ခုလည်း ဖြစ်လာတယ်။
ဒီလုပ်ကြံမှုရဲ့ နောက်ကွယ်မှာ ဘိုင်ဒန်နဲ့ ဒီမိုကရက်တွေ ရှိနေမှာ မဟုတ်ဘူးဆိုတာ ရာနှုန်းပြည့် သေချာပါတယ်။ ရီပတ်ဘလစ်ကန်တွေကလည်း ဒါကို သိပါတယ်။ ဒါပေမဲ့ ဘိုင်ဒန်ရဲ့ မဲဆွယ် မိန့်ခွန်းတွေမှာ ထရမ့်ကို လွန်လွန်ကျွံကျွံ ထိုးနှက် ဝေဖန်ခဲ့တာတွေ၊ ပြည်ဖျက်သမားလို့ ပုံဖော်ခဲ့တာတွေ၊ ဘိုင်ဒန်က သူ့အသက်အရွယ် ကိစ္စကို ငြင်းခုံနေမယ့်အစား ထရမ့်ကိုပဲ ပစ်မှတ်ထားရမယ်လို့ ပြောဆိုခဲ့တာတွေက အခုလို လုပ်ကြံမှုမျိုးကို သွယ်ဝိုက် လှုံ့ဆော်သလို ဖြစ်စေတယ်လို့ ရီပတ်ဘလစ်ကန်တွေက စွပ်စွဲကြတယ်။ ဘိုင်ဒန် ကိုယ်တိုင်လည်း သူ့စကားတချို့ဟာ ရှိသင့်တဲ့ အတိုင်းအတာထက် လွန်ကဲသွားတယ် ဆိုတာမျိုး ဝန်ခံရတဲ့ အခြေအနေ ဆိုက်ခဲ့ပါတယ်။
အကြောင်းတိုက်ဆိုင်စွာပဲ ထရမ့်ကို လုပ်ကြံဖို့ အားထုတ်မှုအပြီး ရက်ပိုင်းအကြာမှာ ရီပတ်ဘလစ်ကန် ပါတီရဲ့ ပြည်လုံးကျွတ် ညီလာခံ (RNC)ကို ဝစ္စကွန်ဆင် ပြည်နယ်ထဲက မီလ်ဝေါ်ကီမြို့မှာ ကျင်းပခဲ့တယ်။ လုပ်ကြံမှု သတင်းကို အကြောင်းပြုပြီး ဒီနှစ် RNCအပေါ် အမေရိကန် ပြည်သူတွေသာ မကဘဲ တစ်ကမ္ဘာလုံးကပါ စိတ်ဝင်တစား စောင့်ကြည့်ရတဲ့ အခြေအနေ ဖြစ်လာတယ်။ ထရမ့်က ညီလာခံ အစောပိုင်း ရက်တွေမှာ သေနတ်မှန်ထားတဲ့ ဒဏ်ရာကို ပတ်တီးကပ်ထားပြီး လူလုံးထွက်ပြတယ်။ ဒါပေမဲ့ အများမျှော်လင့်နေသလို မိန့်ခွန်းပြောတာမျိုး လုံးဝ မလုပ်ဘဲ နှုတ်ဆိတ်နေခဲ့တယ်။ ညီလာခံရဲ့ ကြားရက်တွေမှာ ထရမ့်ဟာ သူ့ရဲ့ ပြိုင်ဘက်ဟောင်း ပါတီဝင်တွေကိုပါ စည်းရုံးရင်း ရီပတ်ဘလစ်ကန်တွေက သူ့ရဲ့ ခေါင်းဆောင်မှု အောက်မှာ တစ်သားတည်း ညီညွတ်နေပြီ ဆိုတာကို ပြခဲ့တယ်။ အသက် ၁၇ နှစ်အရွယ် မြေးမလေးကို ပွဲထုတ်ပြီး လူငယ်တွေကို ဦးတည် စည်းရုံးတဲ့ မိန့်ခွန်း ပြောစေတယ်။
#ludunwayoo #လူထုနွေဦး #NewsUpdate
𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 - / @peoplespring
𝗙𝗮𝗰𝗲𝗯𝗼𝗼𝗸 - / ludunwayoo
𝗪𝗲𝗯𝘀𝗶𝘁𝗲 - www.ludunwayoo...
𝗜𝗻𝘀𝘁𝗮𝗴𝗿𝗮𝗺 - / ludunwayoo
𝗧𝗲𝗹𝗲𝗴𝗿𝗮𝗺 - t.me/peoplespring
Негізгі бет People's Spring | ကျည်တစ်တောင့်ကြောင့် ပြောင်းလဲသွားနိုင်တဲ့ အမေရိကန်ရဲ့ အနာဂတ်
No video
Пікірлер: 43