31 sor bə nav. 1993-nə sori iyunədə Azərboycon Respublikədə bə behakimiyyətəti, devləti strukturonədə vəzifəsə bəyəndı çanq dənoəti Azərboyconi devlətəti çı şubhə jiyo noəj be.
Vəzifəsə bə iyəndı çanq dənoy nətecədə Azərboyconədə vətəndaşə canq bino be əzıni. 1993-nə sori 21 iyunədə rəhbərətiyədəm bə 704 numrəynə briqada çı Azərboyconi, çı Tolışə xəlği vədə ıştə məsuliyyəti dərk kardedə, Bəyonot ğəbul kardedə, Ostoro, Lankon, Lik, Yardımlu, Masəllu, Cəlilobod iyən Biləsıvo rəyononədə jiyəkəson əmin-amanəti nığo doy bəştə qıy qətedə, Azərboyconi pərçəmi jiyo, zəmini, zıvoni de torixi nomi Tolışə Mığonə Respublikə soxte elan kardedə.
Eyni zəmonədə de erməni işğaləkon canq bardedən, əsl ğəhrəmonəti nuşo doydən.
Nətecədə 1993-nə sori avğustə manqi 7-ədə Tolışə Xəlği Məclisədə bə 250 deputati iştirokinə Tolışə Mığonə Respublikə bə muzakirə bekardə bedə və 100 faiz sədo doy bəpeştə Azərboycon Respublikə tərkibədə Tolışə Mığonə Mıxtorə Respublika soxtə bedə, konstitusiyəj ğəbul bedə, himn iyən pərçəmıj təsdığ bedə, Ələkrəm Hummətov Tolışə Mığonə Mıxtorə respublikə prezident vıjınə bedə. İyunə manqədə Heydər Əliyev iyən Dilruba Camalova ımi torixi hadisə hisob kardedən, ım zabiton, sərbozon xəlği ğəhromon, bə Ə.Hummətovi isə devri Babək votedən. Əncəx 1993-nə sori avğustə manqi 12-ədə setərəfinə vindemonədə, yəni Ə.Hummətov, H.Əliyev, S.Huseynovi vindemoni vaxtədə Ə.Hummətov tələb kardedə ki, "zuy naziron səlohiyyət bə Sər Nazir Surət Huseynovi oqırdıniyə bıbu, 1993-nə sori avqusti 28-ədə dəbəvardə referendumədə bə Əbılfəz Əliyevi be'etimodətiro Tolışi məhol iştirok əkəni və nubəku kəno prezident vıjıni dəvone bəyon kardedə. Prezindentə vıjınədə Ayaz Mutəllibov, Əbılfəz Əliyev iyən co nomizədon umjən bıbun, yəni qırd demokratə prezidentə vıjın dəvonə bıbu". Bı soybəti Azərboyconi Respublikə dəvardə Mudafiə Nazir Rəhim Qaziyevən umjən bedə. Əlbəttə ım bə Heydər Əliyevi xoş omedəni, vindemon de mıbohisə və exroc-təhqirinə bə sə qınedə. Tolışə xəlğ bə Boku hiylə ald bedə. Lankonədə yolə təxriboton pesoxtə bedə, insonon peştono jə bedən, iyuni 15-ədə peroxemoni ğəhrəmonon bə (1993-nə sori iyunə manqi 15 peroxemoni ruj devləti id hisob bedə) beqınoə hərbi odəmon de pesoxtə ittihomon dastqir kardə bedən, de dırozə mıddəto ozodətiku məhrum kardə bedən.
Rə-di Azərboyconə Respublikə Parləmentədə bı torixi hodisə huğuği ğıymət doə bəbe və Tolışə Xəlği həx bəy oqırdınə bəbe. Çı 1993-nə sori iyuni 3-4-ku de bə 1993-nə sori avğusti 24 dımınə ambəam mandə əsqər iyən zabiton, bəçəvon valideynon, nezə avlodon ıştə minnətdoəti rosınedəm. Şımə əsl mərdiyəti, ğəhrəmonəti nuşo done, iyəndı ittihom nıkardone, bə iyəndı dim dənımandijon, iyəni exroc nıkardone, iyəndıku dim nıqordone, bə iyəndı komək ve peşt bejon. Xıdo bə həmə şəhidonımon rəhməy bıkə, rufışon şo, vırəjon vəyşt bıbu. Bə jiyə əsqər iyən zabiton dırozəji, xəşəconi orzu kardedəm.
Ve əfsuson bıbu ki, çəmə xəlği ımıj bə sə dənışe, ıştə ğəhrəmononıj mudafiə nıkarde. Xıdo bəçəmə xəlği komək bıbu!
(c) Polkovnik Mikayıl Hacıyev
21 iyun 2024
Негізгі бет Ойын-сауық Polkovnik Mikayıl Hacıyevi muraciət
Пікірлер: 19