قصيدة / على البساط الاحمدي
شعر والقاء الشاعر حامد زيد
كلمات القصيدة :
شد الرحال من الحشا ماعاد لك بالصدر زاد
يكفي طعون البارح اللي ماتشافت بجسدي
قفلت بيبان السهر ماعاد ابي غير الرقاد
الى متى وانا اتبعك مثل الظلام السرمدي
لاصار عشقك ماوراه الا المكابر والعناد
انا ترى ماني على طرد المقفين محدي
الشاعر اللي هام بك .. يقدر يهيم بكل واد
مير انت لاعرضتك فجوج الخلا وين تغدي؟
جيتك وانا جرحي ندي ولا رجيت إلا الضماد
ولا دريت ان الضماد اقسى من الجرح الندي
جيتك عشان اعشق بشر ماهوب عشان اعشق جماد
جيتك عشان انهي معك حزني مهوب جيت ابتدي
دورت بظلوعك دفا ولا لقيت الا الرماد
صدرك مثل ليل الشتا واللي ورى الحدب بردي
على بياضك مالقيت بخافقك غير السواد
وعلى فياضك مارويت الا السراب الجرهدي
لو كان في وجهك حيا ماترخص ايام الوداد
ماتدري ان العمر يقفي وان الايام تعدي
يالعنبوك اربع سنين اجاهد احزانك جهاد
وانت بزعل ليله هدمت الاربع سنين بعدي
ماهو وكاد انك تخاف من الجفا مير الوكاد
إ الردي مهما عملت ،، يرد للطبع الردي
يمكن يجننك الجفا ،، يمكن يحننك البعاد
لكن تتوب من اللعانه والعناد .. اقطع يدي
انا اكثر انسان اجودي وقف معاك في هالبلاد
وانت اكثر انسان غدرت بصدق رجال اجودي
يوم اعتبرت ان العلاقه بيننا كبوة جواد
انا اعتبرت الليله اللي جابتك يوم سعدي
وانا اعبرتك سيدي يوم الغلا بالقلب ساد
والا انت والله منت كفو اقول لك ياسيدي
لو كنت للخير مهدي كان التعب وياك فاد
لكن تعبت لواحدٍ ماهو على الخير مهدي
اللي حصل من تحت راس محبتك كفى وزاد
أجهدت مير المشكلة مافاد وياك جهدي
كنت أعشقك على البساط الاحمدي والعشق باد
وبتركك .. وأنا على نفس البساط الاحمدي
كانك على نفس الطريق السرمدي غاوي طراد
والله لصير ابعد عليك من الثريا للجدي
وان كان لك صبرٍ مدي يقوى على ليل الهجاد
أنا ترى ماعادلي صبرٍ على صبرك مدي
يعني اذا كنت محدي على المكابر والعناد
أنا بعد .. ماني على طرد المقفين محدي
#حامد_زيد
#الشاعر_حامد_زيد
#شعر
#قصيد
#اشعار
#قصيدة
#قصايد_حب
#قصايد_غزل
#عتاب
Негізгі бет قصيدة على البساط الاحمدي / الشاعر حامد زيد
Пікірлер: 11