"Həyat birini verəndə birini alır" deyirlər. Ona isə uğurlu sənət yolu verilib, amma ailə xoşbəxtliyi əlindən alınıb. Biri var idi. Sevilən aktrisa Ofeliya Aslan.
Ofeliya Aslan 1939-cu il yanvarın 27-də Bakının Saray kəndində Xalq artisti, aktyor Rza Əfqanlı və ilk qadın teatr rəssamı, Xalq rəssamı Bədurə Əfqanlının ailəsində doğulub. Atası əslən Güney Azərbaycandan olsa da, bütün həyatı Bakıyla bağlı olub. Sərab şəhərində nökərçilik edən Rza Əfqanlı Bakıda çəkməçi işləyib, hərbi xidmətdən sonra isə dram dərnəyinə yazılıb. Anası Bədurə Əfqanlının yolusa elə əvvəldən rəssamlıq olub. Cütlük dəfələrlə ayrılıb, barışıblar. Ömürlərin sonunda isə ayrı yaşamağı qərara alıblar.
Ofeliya xanım Azərbaycan Dövlət İncəsənət İnstitutunun musiqili komediya aktyoru fakültəsini bitirib. Təhsilini başa vurduqdan sonra Kukla Teatrına təyinat alıb. 1963-cü ildən Musiqili Komediya Teatrında əvvəl xor artisti, ardınca aktrisa kimi çalışıb. O, “El bizim, sirr sizin”, “Olmadı belə, oldu elə”, “Təzə gəlin”, “Nənəmin şahlıq quşu”, “Bankir adaxlı” kimi maraqlı səhnə tamaşalarında rol alıb. Aktrisaya ən böyük uğuru isə “Hicran” tamaşasındakı Çarliston obrazı gətirir.
Əsgərlikdən qayıdanda Səyavuş Aslanı Quba teatrına göndəriblər. Ofeliya xanım isə orada anasının yanına gedib gəlirmiş. Rejissorlar ona da rol verirlərmiş. Səyavuş Aslan orada Ofeliyanı görüb vurulub. Bədurə xanım isə qızının aktyorla ailə qurmasına razı olmayıb. “Mən artistə qız vermərəm” deyib, qızını Qubadan Bakıya qaçırıb. Səyavuşun ailəsi də oğullarının aktrisa ilə evlənməsinə razılıq verməyiblər. Lakin, o, ya Ofeliya ilə evlənəcəm, ya da heç kim deyib inad edib və istədiyinə nail olub.
Deyilənə görə cütlük çox kasıb olduğundan Səyavuş Aslanın toy günündə əyninə geyinməyə bəylik paltarı olmayıb. O, Musiqili Komediya Teatrının direktoru Şəmsi müəllimin yanına gədərək məsələni izah edib. Şəmsi müəllimin tapşırığı ilə Səyavuşa teatrın paltar sexindən bəylik kostyumu seçib veriblər.
Onların Çingiz və Eldar adlı iki oğlu olub.
Ofeliya Aslan 1963-cü ildən Musiqili Komediya Teatrında əvvəl xor artisti, ardınca aktrisa kimi çalışıb. Ana olduqdan sonra o, uzun müddət işləməyib. 1997-ci ildən yenidən teatra qayıdıb.
Bir müddət sonra cütlüyün arasında söz-söhbət yaranmağa başlayıb. Münasibətləri gərginləşib. Deyilənlərə görə onların ayrılmalarına əsas səbəb Səyavuş Aslanın xəyanəti olub. Aktyor teatrda işləyən başqa bir aktrisa ilə isti münasibətlər yaşayıb. Hadisədən xəbər tutan Ofeliya xanım bunu nə qadın həmkarına, nə də sevdiyi insana bağışlamayıb. Bir müddət sonra aktrisanın əsəbləri pozulub, qeybdən səslər eşitdiyini deyib. Səyavuş Aslan isə yaxın adamların məsləhəti ilə Ofeliyanı müalicə almaq üçün ruhi xəstəxanaya aparıb...
O özü bütün bunları belə xatırlayırdı: “... Hələ o zamanlarda məndə vergi əlamətləri hiss olunurdu. Səyavuş dedi ki, bununla bağlı məni hansısa professorla görüşdürəcək... Orada professorla görüşdüm, bir neçə gündən sonra isə hara gətirildiyimi başa düşdüm. 11 gün həmin mühitdə qalıb, geri, evimə qayıtdım. Bu müddətdə qəbul etdiyim dərmanların təsiri altında idim. Amma özümü toplayıb 2 gündən sonra boşanma ərizəsi ilə məhkəməyə müraciət etdim. Səyavuşdan ayrıldım. O vaxt bizim birlikdə yaşadığımız mənzil iki hissəyə ayrıldı və mən bu günə qədər də keçmiş həyat yoldaşımla qonşu kimi yaşayıram”.
Deyilənə görə Ofeliya Aslan çox qısqancmış, amma bunu mümkün qədər büruzə vermirmiş. Ər-arvad küsülü vaxtlarında səhnəyə çıxıb bir-birləri ilə elə danışırmışlar ki, həyatda danışmadıqlarını heç kim ağlına da gətirməzmiş. Hətta “Hicran” tamaşasında oynayanda da küsülü olublar.
Aktrisa 1998-ci ildə yenidən teatra qayıdıb. “Bankir adaxlı” tamaşasında rol alır. Onunla tərəf müqabili olan aktrisalardan birinə bir gün Ofeliya xanım həyatının yekun mənzərəsini belə izah edib. “Səyavuşla biz ayrılmazdıq, bizi ayırdılar. Teatrın dedi-qodusu bizi ayırdı. Ahıl yaşlarında hər ikisi peşman olublar. Amma heç biri o birinin qarşısında əyilməyib. Ömürlərinin sonuna qədər küsülü qalıblar, qəlbən bərabər, cismən ayrı yaşayıblar.
Səyavuş Aslanla ayrılsalar da, Ofeliya xanım çox vaxt keçmiş həyat yoldaşının qayğısına qalıb, yeməyini bişirib, paltarlarını yuyub-ütüləyib...
Sonralar Səyavuş Aslana başqası ilə evlənmək təklif olunsa da razı olmayıb. Deyib mən başqası ilə evlənsəm qeyrətsiz olaram. Axı mən Ofeliyanı sevmişəm.
Aktrisa həmişə deyirmiş ki, heç ölmək istəmir. Bir yeri ağrıyan kimi təlaş keçirirmiş. Əslində, sağalmaz xəstəliyə tutulubmuş, amma həkimlər bunu ondan gizlədiblər. Ölənə qədər də bilməyib.
Beləcə, kədərli günlər yaşayan Ofeliya xanım 2010-cu ilin 18 mayında səssizcə vəfat edib. Onunla vidalaşarkən göz yaşları axıdan Səyavuş Aslan uzun müddət xəstə yatandan sonra 27 iyun 2013-cü ildə 77 yaşında Ofeliya xanımın ölümündən üç il sonra dünyasını dəyişib.
Негізгі бет Qeybdən səslər eşitdi, əri onu aldadıb ruhi xəstəxanaya saldırdı, ölümcül xəstəliyə tutuldu
Пікірлер: 57