رثاء من القلب لصديق العمر
#أبوشادي_طليع_حمدان يرثي صديق عمره وركن جوقته المغفور له الشاعر شوقي علي شعبان
قلّي الورد بدل الندي والقوت
خدني عا شوقي دوب من شوقي
يا ورد قلتلّو : لا تحكي سكوت
يا غصن عا إيدي وغصن فوقي
شوقي اللي كان رفيق صار سكوت
ومات هالمرّه قمر جوقي
والورد لمّا بينقطف بيموت
دخلك ما بدي أقطفك يا ورد
بيموت مرّه تانيه شوقي
#
شوقي كنت أطهر من النسّاك
شوقي كنت زهره بلا أشواك
وألطف من العطر بظلال الفَيّ
وأوفى الوفايا للوفي الربّاك
يا رفيق عمري يا حنين الخَيّ
مت وأنا عم بسألك شو باك
لكن إنت بعدك بقلبي حَيّ
بس قلتلك خلص شوقي
بكينا على شوقي أنا وياك
#
خدّي صُفي أرشيف للدمعات
وبكل دمعه خيّ أرشفتك
ما قبلت نشّفهن على النهدات
بلكي بهالدمعات نشّفتك
حممت ظلّك بِ ندى الوردات
جبتلك الفيّات منشفتك
كانت يا شوقي آخر المرّات
اتطلّعت ما شفتك من سويدا
بكّيتني تا بدمعتي شفتك
#
كان الصبح لما يجي ليي
احكي معك .. إسمع تعاليمك
ولمّا غيابك عتّم عليي
عتّم صباحي متل تعتيمك
بدل ما تسلّم على الزوّار
وعا السّويدا وعَ معازيمك
راحت ع نعشك دبلت الأزهار
للنعش لمّا تمّ تسليمك
ومتلي علاء غضبان باكي صار
بدل ما يسمع ترانيمك
لمّا المذيعه قدّمت أشعار
قدّم دموعو بدل تقديمك
قضّيت عمرك عا طليع تغار
وبيت المعنّى كان تصميمك
لكن عَ السويدا بهالمشوار
بدل تكريمي أنا ويّاك
يتّمت قلبي بِ يوم تكريمك
مملكة الشاعر طليع حمدان
#أمير_الزجل_اللبناني
#طليع_حمدان #زجل
#رثاء #شعر #جوقة_الربيع #شوقي_شعبان
Негізгі бет رثاء من القلب لصديق العمر
Пікірлер: 4