ရုရှားနိုင်ငံ၊ စိန့်ပီတာစဘာ့ဂ်မြို့မှာ နှစ်စဥ် ကျင်းပလေ့ရှိတဲ့ နိုင်ငံတကာ စီးပွားရေးဖိုရမ် ပြီးခဲ့တဲ့ သီတင်းပတ်ထဲ ကျင်းပခဲ့တာမှာ ယူကရိန်းထဲ ရုရှားက ကျူးကျော်စစ် ပြုလုပ်နေတာကြောင့် အနောက်အုပ်စုကနေ လာတက်တဲ့သူတွေ နည်းသွားပါတယ်။
ဒါပေမယ့် တရုတ်၊ အိန္ဒိယ၊ အီရန်တို့လို စီးပွားဘက်တွေ၊ အာဖဂန်နစ္စတန်ကို ပြန်လည်ထိန်းချုပ်လိုက်ပြီး ရုရှားနဲ့ ဆက်ဆံရေး ကောင်းနေတဲ့ တာလီဘန်အဖွဲ့ရဲ့ ကိုယ်စားလှယ်တွေ၊ ရုရှားက ကျောထောက်နောက်ခံ ပြုပေးထားတဲ့ ယူကရိန်းထဲက ခွဲထွက်အုပ်စု ဒွန်းညက်စ် ရီပတ်ဘလစ် တည်ထောင်ထားကြသူတွေ ... အစရှိသဖြင့် သမ္မတ ပူတင်ရဲ့ မဟာမိတ်တွေကိုတော့ အဲဒီ စီးပွားရေး ညီလာခံမှာ စုံစုံညီညီ တွေ့ခဲ့ရပါတယ်။
နေပြည်တော် စစ်ကောင်စီကလည်း သူတို့ခန့်ထားတဲ့ ပြည်ထောင်စု အဆင့် ဝန်ကြီး ၅ ယောက် အထိ စေလွှတ်ခဲ့ပါတယ်။ စီမံဘဏ္ဍာ၊ နိုင်ငံတကာ ရင်းနှီးမြှုပ်နှံမှု၊ ကုန်သွယ်ရေးနဲ့ လျှပ်စစ်စွမ်းအင် အစရှိတဲ့ စီးပွားရေး အတွက် အရေးကြီးတဲ့ ကဏ္ဍတွေက သူတွေ ရုရှားကို သွားခဲ့ကြတာပါ။
လောင်စာနဲ့ လျှပ်စစ် ရုရှားဆီက ရနိုင်ဖို့နဲ့၊ ရုရှားဗဟိုဘဏ် ဖော်ဆောင်ထားရှိတဲ့ ဘဏ်တွေကြား ဆက်သွယ် သတင်းစကားပို့တဲ့ ကွန်ရက်စနစ်ထဲ ပါဝင်နိုင်ဖို့ အပေါ်စစ်ကောင်စီ ကိုယ်စားလှယ်တွေ အာရုံစိုက်ခဲ့ကြတယ်လို့ ရုရှားက လာတဲ့ သတင်းတွေက ဆိုပါတယ်။
အိန္ဒိယ သမုဒ္ဒရာ ကမ်းရိုးတန်းရှိတဲ့ မြန်မာဟာ ရုရှားအတွက် ဗျူဟာမြောက် မိတ်ဖက်နိုင်ငံ ဖြစ်လာနေပြီလား .... နေပြည်တော် စစ်ကောင်စီ နောက်မှာသာ ရုရှားက အခိုင်အမာ ရပ်လာပြီဆိုရင် အနောက်အုပ်စုရဲ့ ပိတ်ဆို့မှုတွေ အရာမရောက်နိုင် ဖြစ်လာမလား ... စတာတွေကို ဒီတစ်ပတ် အာရုံစိုက် ဆွေးနွေးသွားမှာ ဖြစ်ပါတယ်။
ဒီ တစ်ပတ် ပါဝင်ဆွေးနွေး ထားသူတွေကတော့ အမျိုးသားလွှတ်တော် ကိုယ်စားလှယ်ဟောင်း စီးပွားရေး လေ့လာသုံးသပ်သူ စာရေးဆရာ ဦးသန်းစိုး (ဘောဂဗေဒ) နဲ့ ၊ မြန်မာ့အရေး မူဝါဒတွေနဲ့ ပတ်သက်ပြီး ဗြိတိန် အစိုးရကို ဆယ်စုနှစ် အဆက်ဆက် ဝေဖန် အကြံပြုနေတဲ့ ဘားမားကင်ပိန်း ယူကေ အဖွဲ့ကို ဦးဆောင်သူ မာ့ခ် ဖာမနာတို့ပဲ ဖြစ်ပါတယ်။
ကိုဝေဖြိုး စီစဥ် တင်ဆက်ထားပါတယ်။ #ဘီဘီစီမြန်မာပိုင်း #သတင်းမြင်ကွင်း
Негізгі бет ရုရှားလိုလားသူများ စုဝေးခဲ့ရာ စိန့်ပီတာစဘာ့ဂ် စီးပွားရေးညီလာခံ - BBC News မြန်မာ
No video
Пікірлер: 35