كلمات الشاعر : سعد صالح المطرفي
إعداد وتصميم: عبدالرحمن وائل
الوقت يقلب وعادات الليالي تدور
وابن ادم ان يرزق فييرزق على نيته
ياكم مليك هباه الله عيش قصور
واصبح ولحد اعترف في حق ملكيته
ويا كم فقير يا دوبه لو يحصل فطور
واصبح كثير الغنى من عقب حاجيته
الله ليا من رزق يرزقك رزق الطيور
والله ليا من منع يمنعك خيريته
والناس للناس والخالق يحب الشكور
ولا يحب الاناني من أنانيته
والا انت ياللي تشارهني تراك امعذور
ما جاك رمح الزمان وجتك جنبيته
لو ذقت ما ذاق خفاقي فبعض الامور
بتعرف كيف الرجل يفقد مثاليته
الصدر ماهو على خبرك وسيع .. امحشور
ترك شماله عقب عناق حجازيته
لن اغلب الناس بالهيئه شبيه عطور
يعجبك شكله ولكن ويش ماهيته
وانا انصدمت بكثير وكم سلعه تبور
بس أقتنع عن كثير الربح بشويته
رجل صامل ولا عشرين رجل هذور
يغنيك بالفعل لو كثرت حراميته
على كثر ماقدرت اغدر سريت امغدور
لني ماحب الغدر واكره زبانيته
فيا زارع الزرع قبل الزرع شوف البذور
اخاف تتعب على زرع تشح فيته
والرجل صقار ربعه والرفيق امخبور
اللي ليا انخي بلسانه طرت خيته
وانا اغلب من الرجال المستميت الجسور
المحتمي والمثل يضرب من احميته
وانا اكره من الرجال العنصري النكور
اللي تبين مع العالم حزازيته
وانا ليا جيت احب اكون طاغي حضور
احسن من اللي يجي محد درى بجيته
اما اني اجمل إسمي لا اتكتبلي ظهور
او يلعن ابو الظهور وتنلعن ميته
رجال والعقل في راسي وصوتي جهور
ويمناي من دون حقي ماهي ابميته
فلا صرت مرضي بشعري كل صاحب شعور
قل للجماعه (سعد) تكفيه ربحيته
#سعد_صالح_المطرفي
#Abood_wael...❤
Негізгі бет سعد صالح المطرفي - الوقت يقلب وعادات الليالي تدور ...❤🎻
Пікірлер: 97