Шу ауданына қарасты Алға ауылдық округіндегі Сауытбек ауылында жұртшылық өкілдері күткен жарқын іс бастау алған еді. Бір жеңнен қол, бір жағадан бас шығарған ауыл тұрғындары туып-өскен жерлеріне имандылық жолында мешіт салуды көздеген болатын. Міне, көптен күткен аталмыш мешіттің құрылысы да аяқталып, тұрғындардың игілігіне беріліп отыр. Ауылдың кіреберісінде орналасқан Асайын Шыныбекұлы атындағы мешіт 14 сотық жерге орналастырылған. Мешітте құлшылық бөлмесі, имамға арналған жеке бөлме, табиғи газбен жұмыс істейтін қазандық және ауладағы ас беру алаңы мен дәрет алатын арнайы орын қарастырылған. Игі істі бастамас бұрын, мүфтияттан рұқсат алып, құжаттарын да рәсімдеп қойған көрінеді. Сонымен қатар, мұнда бір мезетте 150-ден аса адамның намазға жығылуына мүмкіндік бар. Мұсылманды тіліне, нәсіліне, ұлтына қарап бөлмей, бастарын бір жерге тоғыстыратын құтты мекеннің ашылу салтанаты Асайын кәлпенің немересі Данияр Кәрібайұлының Құран бағыштауымен басталды. Алғашқылардың бірі болып сөз сөйлеген аудан әкімінің орынбасары Әлихан Балқыбеков ауыл тұрғындарын жаңа мешіттің ашылуымен аудан басшысының және өзінің атынан құттықтады. Сонымен қатар, ҚМБД-нің Жамбыл облысы бойынша өкілі Хибатулла Тарази мешітінің бас имамы Қанат Жұмағұл да құттықтау сөздерін сөйлеп сыйлыққа Құран кітапты табыс етті. Жаңа мешіттің имамы болып ауылдан шыққан Шаттық Қамалбаев мешіттің бас имамы болып тағайындалды. Бұдан соң ауылдың рухани болмысына жаңа серпін беретін сәулеті мен сәні жарасқан мешіттің лентасы да қиылды. Бір айта кетерлігі, мешіт құрылысының жүзеге асуына атсалысқан Жақсығұл Диқанбаевқа ауыл тұрғындары ат мінгізіп, шапан жапты. Шара соңында игі істің қуанышын бөлісуге келген қонақтар мен ауыл тұрғындарына ақ дастархан жайылып, ас беріліп, қазақтың ұлттық ойындарының бірі көкпардан жарыс ұйымдастырылды.
Негізгі бет Сауытбек ауылында "Асайын кәлпе" мешіті ашылды.
Пікірлер: 9