MORE PERFORMANCES HERE:
brianveeee.tumblr.com/poetry
A spoken word piece I wrote for Sali Production's "What If: The World Ends Tomorrow" Music & Poetry event.
--
"Kung Alam Ko Lang" by Brian Vee
(originally "Ang Boy Scout ay Laging Handa")
Noong 2012, sabi nila magugunaw na raw ang mundo.
Nagkamali sila.
Maliban nalang kung ang tinutukoy nilang mundo, ay ang mundo naming mag-iina.
Ayon sa theory of relativity, "Time slows down as you approach the speed of light."
Wala pa akong narinig na taong kayang tumakbo ng ganun kabilis
pero nung araw na yun noong 2012
Noong araw na kinailangan kaming iwan ng nanay ko ng walang paalam,
gusto kong subukan.
Gusto kong tumakbo na may bilis na higit pa sa bilis ng liwanag.
Baka sakaling mapabagal ko ang paligid
Baka sakaling mapatigil ko ang oras
At kunsakali man na sa aking pagtakbo ay matalo ko ang kidlat sa pabilisan
Baka sakaling... makausap ko pa ang nanay ko nung bago siya lumisan.
Sabi nila, ang pagtingin daw sa mga tala ay parang pagsulyap sa nakaraan.
Alam mo ba na inaabot ng libo-libong taon bago makarating sa atin ang liwanag ng mga bituin na malalayo?
Alam mo ba na dahil dito, malamang, ang ilan sa kanila, bagamat natatanaw parin natin ang liwanag ay matagal nang naglaho?
Ang pagtingin sa mga bituin ay parang pagsulyap sa nakaraan.
Nagtime travel pala ako nun ng di ko nalalaman
Parang panaginip ang lahat.
Maraming beses ko na binisita ng sulyap ang mga kumukurapkurap na liwanag sa langit pero nung araw na yun...
Noong araw na yun amoy ospital ang kalawakan
at saking harapan? isang bituin na sapat ang lapit para mahawakan.
Ang bituin na ilaw ng tahanan
Pasimuno ng tawanan
Ngayo'y walang kibo sa kanyang munting abangan.
napapagod din pala ang mga bituin.
Lumalaban, pero nauubusan din ng sigla
Marilag at makapangyarihan, oo pero..
Mortal din pala sila.
noong elementary pa ako, nakapanood ako ng video simulation ng isang pumapanaw na bituin.
Kunsino man yung gumawa nun, nagkamali sila, tahimik lang ang pagpanaw ng isang tala.
Walang malakas na pagsabog.
Walang nakakasilaw na liwanag.
Gusto ko sanang ilarawan ang katotohanan pero miski mga nasaksihan ko'y di ko rin kayang ipaliwanag.
Kung may kakayahan lang bumigkas ang mga mata, at ang katumbas ng bawat luha ay salita,
naisulat ko sana sa mga panyo ko nun ang pinakamahaba kong tula.
Noong gumraduate ako ng highschool, inawardan akong Boy Scout of the year
Nagkamali sila
Boy scout nung high school siguro pero hindi ng pagtanda
dahil noong araw na kailangan kong harapin ang masaklap na katotohanang magiging ulila na ako sa aking ina, hindi ako handa.
Hindi ako handa sa katotohanang hindi ko na maririnig ang tinig ng babaeng unang nagturo sa akin kung paano bumigkas
magbasa, magsulat, sumayaw at gumuhit ayon sa tema
Kung paano tumawa sa kabila ng lahat ng pinapasang problema
May mga bagay pala sa totoong buhay na akala mo nangyayari lang sa mga telenobela.
Pakiramdam ko nagmaneho ako sa high-way ng tadhana habang di ko hawak ang manibela.
At bago ko pa matanong ang sarili kung tama ba ang kalsadang dinadaanan
Bago ko pa naisip kung kailangan ko bang lumiko sa kaliwa o sa kanan
Sinalubong ako ng rumaragasang ten-wheeler truck ng katotohanan.
Maraming beses na nasagot ang tanong na "kung huling araw mo na sa mundo, paano mo ito gugugulin?"
pero "kung huling araw na ng magulang mo sa mundo, paano mo ito gagamitin?"
Kung alam ko lang?
Nanatili sana ako sa iyong tabi.
Hindi na sana ako umuwi at natulog mag-isa
Sa pag-aakalang ang bukas ay ordinaryong bukas na tulad lamang ng iba.
Naikwento ko sana sayo kung paano hinulma ng Diyos ang mga tala.
Kung gaano ka Niya kamahal, kahit ngayong ang hirap maniwala.
hindi na maibabalik ang mga pumanaw na bituin, hindi narin ang nakaraan.
Pero patunay ang gabing iyon na ang Diyos ay maparaan,
sa pagtitig ko sa mga bituin, literal akong naliwanagan.
Kung inaabot ng libo-libong taon bago makarating sa atin ang liwanag ng mga bituin na malalayo,
malamang, ang ilan sa kanila, bagamat natatanaw parin natin ang liwanag ay matagal nang naglaho
Hanggang ngayon, nakikita parin kita sa langit.
Minsan sinusubukan ko paring tumakbo, kahit di ko alam kung bakit.
wakas.
Негізгі бет Ойын-сауық Tagalog Spoken Word Poetry: "Kung Alam Ko Lang" (FIRST!)
Пікірлер: 97