Səfiyevlər ailəsi bir neçə il bundan əvvələ kimi Nəsimi rayonu, Feyzulla Qasımzadə küçəsi ev 26-da yaşayıb.
APA TV-nin xəbərinə görə, daha sonra yaşadıqları ərazi pilot layihə kimi söküntüyə cəlb edilib və yerində hündürmərtəbəli yeni binaların tikilməsinə qərar verilib.
Bu zaman orada yaşayan ailələrin müvəqqəti ərazidən köçürülməsi və onlara hər ay 600 manat kirayə pulunun ödənilməsi, eyni zamanda tikiləcək binada yeni təmirli mənzilin verilməsi qərara alınıb.
Şikayətçi Rəfiqə Nəcəfova deyir ki, ilk aylar verilən vədlər yerinə yetirilsə də, sonradan tikinti şirkəti kirayə pullarının ödənilməsindən imtina edib: “Elə ki, mən haqqımı tələb edib mənzillərin təmirindən və sayğacların quraşdırılmamasından şikayət etdim, o zamandan bizim kirayə pullarımızı kəsdilər. Artıq üçüncü aydır ki, biz kirayə pulumuzu ödəyə bilmirik”.
Şikayətçi Rəfiqə Nəcəfova da Səfiyevlər ailəsi kimi, “Avrasiya Construction Ltd” MMC inşaat şirkətindən şikayətçidir. Deyir, şirkətin məsul işçiləri olan Samir və Orxan Əliyev qardaşlarına dəfələrlə kirayə haqlarının ödənilməsi ilə bağlı müraciət etsə də, ona bildirilib ki, “get, verdiyin şikayətləri geri götür, ondan sonra razılaşaq”: “Danışığa gəlirəm, qəbul etmirsən, hər dəfə deyirsən iclasım var, məni saatlarla çöldə saxlayırsan, axırda “get, sabah gəl” deyirsən. Mən bu evi verəndən xəstəlik tapmışam. Niyə çıxıb mənə insan kimi qulaq asmırsınız? Şirkətin rəhbəri Samir müəllimdir və bir də Rəfael müəllimdir”.
Şikayətçilər deyir ki, tikinti şirkətinin özbaşınalığı bununla bitmir: “Mənə deyilən ev, bax, bu evdir, layihə budur. İlk layihədə balkon var, amma sonrakı layihədə balkonu bizdən alıb veriblər o biri satlıq mənzilə. Mən də ona görə şikayət etdim, həm də mənə verdikləri evin bir otağı cəmi 8 kvadratdır. Dedim, ay Samir müəllim, axı bu otaqda necə yaşamaq olar, dedi, bir çarpayı qoya bilərsiz. Axı bizim 5 nəfərlik ailəmiz bu otaqlarda necə yaşasın?”
Sakinlərin şikayəti ilə bağlı “Avrasiya Construction Ltd” MMC inşaat şirkətinin rəhbərliyi ilə əlaqə saxlamağa çalışdıq. Əvvəlcə şirkətin rəhbərləri mühafizəçi vasitəsilə şikayətçi Rəfiqə Nəcəfova və kameramız olmadan görüşə biləcəyimizi bildirdilər. Tərəfimizdən buna etiraz edildikdə isə bildirdilər ki, məsələ ilə bağlı hər hansı cavab vermək istəmirlər.
Hazırda bir neçə saatdır ki, biz “Avrasiya Construction Ltd” MMC inşaat şirkətinin ofisindəyik və şikayətçilərin səsləndirdikləri iddialara şirkət tərəfindən hər hansı bir cavab verilmir. Belə olan halda məsələ ilə bağlı İcra Hakimiyyətinin mövqeyini öyrənməyə çalışacağıq.
Nəsimi rayon İcra Hakimiyyətində də məsələdən xəbərdardırlar. İcra başçısının müavini Qurban İsmayılov bildirdi ki, sakinlər kirayə haqqı məsələsində tam haqlıdırlar. Buna görə də bu gün şirkət rəhbərliyinə tapşırılıb ki, sakinlərin kirayə pulları mütləq ödənməlidir. Bu məsələ birmənalı olaraq yubadıla bilməz. Şirkət rəhbərliyi 3 aylıq kirayə pullarının bu gün ödənilməsini öhdəsinə götürüb.
O ki qaldı mənzillərin layihədən kənar tikilməsinə, Qurban İsmayılov bildirdi ki, bu məsələ məhkəmə predmeti olduğundan, sakinlər məhkəməyə müraciət etməlidirlər.
Hər halda, görünən mənzərə odur ki, aylardır sakinləri get-gələ salan şirkət rəsmiləri dövlət qurumlarının işə qarışmasından sonra etdiyi qanun pozuntusunu aradan qaldırmağı öhdəsinə götürdü. Ümid edək ki, verdikləri söz elə söz olaraq qalmayacaq. Ən azı ona görə ki, Səfiyevlər ailəsinin övladı, əsgər Elnur Səfiyev Vətən Müharibəsi başlayan ilk gündən döyüşlərə qatılıb, torpaqlarımızın düşmən tapdağından azad olunması uğrunda gözünü qırpmadan vuruşub və hazırda da xidmətini davam etdirir.
Rəsmi facebook səhifəmiz: / tvapaxeber
Rəsmi instagram səhifəmiz: / apatvresmi
Rəsmi twitter səhifəmiz: / apatvofficial
#apatv #apaxeber
Негізгі бет Tikinti şirkəti sakinlərin kirayə haqqlarını niyə ödəmir? - ARAŞDIRMA
Пікірлер