Елімізде күніне коронавирустан жүздеген адам қайтыс болып жатқанда, тығылып той тойлап жүргендер тыйылмай тұр. Мәселен, Қарағандыда коттедждегі думанды шараны тоқтатпақ болған мониторинг топ өкілдерін үй иелері ішке кіргізбей қуып шыққан. Тіпті той иесі өзін тәртіпке шақырған полицейлерге де бой бермей, оларды да далаға жұлқылап шығармақ болды. Ал қазақстандық әншілер мен танымал адамдар шақырған той-томалақ пен сауық кештерден бас тарта алмай жүр. Тіпті әлеуметтік желілерде өздері қатысқан кештің видеоларын ашық түрде, жарыса салып жатыр. Бірақ, карантиндік талаптарды елемей жүрген жұлдыздар әзірге жауапкершілікке тартылған жоқ.
Қарағандыдағы «Күнгей» ауданында 100 адам лық толған коттеджде туған күн тойланып жатқан. Мұны естіген мониторинг топ өкілдері думанды шараны тоқтатуға келген. Алайда ашуға булыққан еңгезердей бес азамат бақылаушылардың алдарынан атып шығып, сөзге келген. Ерегескендер тіпті оларды желкелеп, есіктен жұлқып қуып шыққан. Мобильді топ өкілдері ақыры полиция шақыртқан. Бірақ үй қожайындары тәртіп сақшыларына да бой бермеген.
Мониторинг топ өкілдері тексеріс кезінде осындай келеңсіз жағдайға жиі тап болатындарын айтады. Сөздерінше, демалыс күндері тексерген әр бесінші мейрамханадан қарсы шыққандар табылыпты.
ХӘЛЕЛ ӘКІМЖАНОВ, Қарағанды қаласы әкімінің орынбасары:
- Мобильді топ қызметкеріне заңға қайшы әрекет жасаған адамдарды оңтүстік шығыс полиция бөліміне жеткізді. Аталған азаматтарға әкімшілік айыппұл салынды.
Демалыс күні «Алашұлы» тобының экс-солисі Әзімбек Байлин бастаған белгілі азаматтар шектеулерге қарамастан Қарағанды тойын қыздырып жүр. Әнші мен той иелерінің инстаграммдағы видеоларына қарағанда, қыз ұзату өткізілген.
Ал "қызыл қоңыр" аймақтағы Алматыда кеше Қазақстан жұлдыздарының қатысуымен бургер орталығы ашылып, жұрттың әбден ашуын туғызды. Желі қолданушылары белгілі әртістердің желідегі жазбаларын көріп, карантин шараларын сақтамағандарға шағымданған. Жұрттың шағымынан соң бақылау тобы еріксіз тексеруге барған. Олар мейрамхана иелеріне түсіндірме жұмыстарын жүргізіпті. Бірақ тұсаукесерге қатысушылар мен танымал адамдарға қандай шара қолданатындары әзірге белгісіз.
Есесіне Павлодарда тәртіп қатаң. Қалада мониторинг топ өкілін көріп, сасып қалған қалыңдық ақ көйлегінінің етегін көтеріп тойдан қашып кеткен. Полиция осы думанға жиналған 30 адамға түгел айыппұл салған. Алматыда өткен аптада бес мейрамханада түрлі ауқымды жиындар өткізілген. Ал бір Қарағандының өзінде сенбі - жексенбі күні 12 той-томалақ, жасырын сауық кеші тойланған. Полиция той иелері мен мейрамхана қожайындарына 10 миллион теңгеден астам айыппұл салды.
Диана Сапарқызы
Бізді әлеуметтік желіде оқыңыздар:
KZitem - / @informburo31kanal
Facebook - / informburo31
Instagram - / informburo31
Vkontakte - vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31
#той #карантин #қазақстан_жұлдыздары #тамада
Негізгі бет «Тойды тоқтатпақ болған полицейлерді жұлқылап қуып шыққан». Думанды шаралар елде неге азаймай тұр?
Пікірлер: 474