ТУҒИЛГАН КУНИНГДА
Севгилим, туғилган кунингда
Ўзингни кўролмай, йиғлайман,
Шодликка йиқилган тунингда
Ҳолингни сўролмай, йиғлайман.
Сен энди бировнинг қўлинда,
Кўзларим Марғилон йўлинда,
Руҳ кезар Карбало чўлинда -
Бир жойда туролмай, йиғлайман.
Эллик йил ичинда тўкилган,
Топилмай, ёлғонлар тўқилган,
Шу бугун қошимга йиғилган
Ёшимни теролмай, йиғлайман.
"Қошингни қор қилиб қўйдинг", - деб,
"Дунёни тор қилиб қўйдинг", - деб,
"Бировга ёр қилиб қўйдинг", - деб,
Ўзимни уролмай, йиғлайман.
Сенингсиз яшашдан тўйибман,
Дардларим шу кунга уйибман,
Мен сени "Жоним" деб қўйибман -
Жонимни беролмай, йиғлайман.
24 апрель, 2000
© Муғанний
Негізгі бет "Tug'ilgan kuningda" - Shahina Abdurazzoq
Пікірлер