Тохсунньу - Таҥха Хаан ыйа. Билиилээх-көрүүлээх олох кэмэ.Тохсус дом бнгэргэнэр.
Тохсунньу иччитэ Сэһэн Таҥха кэлэр. Кини таҥханы, дьылҕаны түстүүр.
Таҥха Хааҥҥа уонна Сэһэн Таҥхаҕа туһулаан бу курдук алгыыбыт.
1
Дьээ-буо!
Алака-чалака!
Билиилээх олох айыыта
Таҥха Хаан тойон
Үрүҥ тыына
Үрүҥ былыт буола
Бэттэх буол.
Үрүҥ сылгы
Үүт маҥан кылынан
Күндүлээн эрэбин.
Туску, туску, туску.
2
Дьээ!
Алам-чалам!
Үөтүүлээх билии төрдө,
Тохсунньук иччитэ
Сэһэн Таҥха
Тойон эһэм
Үрүҥ былыты
Үрүҥ күлүк гына
Бэттэх буол.
Мичик аллай,
Истэ сэргэҕэлээ,
Арыылаах саламаатынан
Айах тутан эрэбин.
Ытык тылбын ыл,
Сүҥкэ тылбын көтөх.
Дуом айхал.
3
Көхсүттэн көнтөстөөх
Күн өркөн ууһа,
Арҕаһыттан тэһииннээх
Айыы хаан аймаҕа
Арыаллаһар аналлаах
Айыы санааны арыйан,
Ааттаан-тускулаан
Маннык диэн
Аманыйан эрэбит.
4
Уҥа диэки
Тохсунньу ыйы кытта
Добдугураччы кэпсэтэр
Тоҕус уостаах
Дуолан сэргэлээх
Айыы саҕыала,
Урааҥхай удьуора
Дьоһуннаах олбохтон,
Туруктаах олохтон,
Киһилии кэпсэтэн,
Сахалыы саҥаран эрэбин.
Орто туруу дойду
Дьуларыйар оройугар,
Туйгуутуур уорҕатыгар,
Көй киинигэр,
Көмүс ураанньыгар
Көхсүттэн көнтөстөөх,
Көмүскэс сүрэхтээх
Күн айыы аймаҕа
Көһөн киирэн
Көҥүлгэ көҕүтэр
Күн айыы санааны
Сахпыта.
Арҕаһыттан тэһииннээх,
Аһыныгас санаалаах,
Алгыска эрэ баҕалаах
Ахтар айыы аймаҕа
Аат ааттаан киирэн
Аал уоту оттубута,
Алтан сэргэни аспыта.
Ол туһунан
Сэһэргиир сэһэммин,
Кэрэһилиир кэтит кэскилбин
Тыллаах чыычаах гына
Иччилээ дуу.
Саҥарбыт саҥам сабаҕатын,
Тобуллар тойугум номоҕун
Өрө дылбат.
Өлбөт-сүппэт
Уруйдаах төлкөнү олорт.
Силик буоллун.
Дом.
Алгыс бүппүтүн кэннэ туомҥа баар дьон дэйбиири өрө тутан үстэ тускулуур.
Негізгі бет Ғылым және технология Утумнааһын: Сэһэн Таҥханы олордуу
Пікірлер