Qur’onni anglatgan ey mohir tilmoch,
Holis duolarni boshimizdan soch,
Baytulloh eshigin mo‘minlarga och,
Xush kelding oylarning shoxi Ramazon,
Xush kelding Islomning Mohi Ramazon!
Yana masjidlarga to‘lsin dindorlar,
Bemor, hastalardan ketsin ozorlar,
Insof bilan yutsin bizni mozorlar,
Xush kelding oylarning shoxi Ramazon,
Xush kelding Islomning Mohi Ramazon!
Bizdek noshudlarga imkonim, oyim,
Mehr, muruvvatga, iymonga boyim,
Joynamozda bo‘lsin eng so‘nggi joyim,
Xush kelding oylarning shoxi Ramazon,
Xush kelding Islomning Mohi Ramazon!
Zolimning qalbiga rahm solganim,
Ayro ko‘ngillarga ko‘prik bo‘lganim,
Sen kelsang do‘st bo‘lib bosh egar g‘anim,
Xush kelding oylarning shoxi Ramazon,
Xush kelding Islomning Mohi Ramazon!
Shaytonning oyog‘u-qo‘lin kishanlab,
Yo‘lingga ko‘z tikkan zorlarni siylab,
Yetti milliardidan bir bizni tanlab
Xush kelding oylarning shoxi Ramazon,
Xush kelding Islomning Mohi Ramazon!
✍️Malika Salimova
🎙Shahina Bahodirova
Негізгі бет Xush kelding Ramazon!
Пікірлер: 2