Yunan-Roma Güləşi üzrə XXVII "Nadir Agayev Turniri". (Masallı 21.10.2023)
21 oktyabr 2023-cü il tarixdə Azərbaycan Güləş Federasiyasının və Lənkəran-Astara Regional Gənclər və İdman İdarəsinin birgə təşkilatçılığı ilə Masallı Olimpiya İdman Kompleksində SSRİ idman ustası, Azərbaycan Respublikasının Əməkdar məşqçisi, tanınmış pəhləvan Nadir Yaqub oğlu Ağayevin xatirəsinə həsr olunmuş yeniyetmələr arasında XXVII ənənəvi açıq Respublika turnirinin açılış mərasimi olub.
Əvvəlcə Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib, Dövlət himnimiz səslənib.
Lənkəran-Astara Regional Gənclər və İdman İdarəsinin əməkdaşı bildirib ki, yarışın keçirilməsində məqsəd Nadir Ağayevin keçdiyi şərəfli idman yolunun təbliği, yeniyetmələr arasında yunan-Roma güləşi idman növünün inkişafı və kütləviliyi, onların vətənpərvərlik ruhunda tərbiyəsi, idmançılar arasında dostluq əlaqələrinin möhkəmləndirilməsi, eləcə də yeniyetmələrdən ibarət ölkə yığma komandasına namizədlərin seçilməsidir.
Çıxış edənlər Nadir Ağayev güləş məktəbinin Azərbaycan idmanında tutduğu mövqedən danışıb, mötəbər yarışlarda əldə edilən nailiyyətlərin ölkə rəhbəri, Milli Olimpiya Komitəsinin Prezidenti İlham Əliyev tərəfindən idmana göstərilən diqqət və qayğının təzahürü kimi səciyyələndiriblər.
Ölkədə idmanın inkişafından söz salan natiqlər günbəgün tərəqqi edən güləşimizdən, ustad məşqçilərin əvəzsiz xidmətindən, bu şərəfli ənənəni idman tariximizdə zəfərli illərlə yaşadıb davam etdirməyi diqqətə çatdırıb, idmançılara uğurlar arzulayıblar.
Nadir Ağayevin ailə üzvü, “Pəhləvanın salnaməsi” kitabının və eyniadlı filmin müəllifi, jurnalist-publisist Akif Ağayev idman tədbirinin təşkilinə görə Gənclər və İdman Nazirliyinə, Azərbaycan Respublikası Güləş Federasiyasına minnətdarlığını bildirib.
Qeyd edək ki, 21-22 oktyabr 2023-cü il tarixdə keçirilən turnirdə 2007-2009-cu il təvəllüdlü yunan-Roma güləşçiləri 11 çəki dərəcəsində mübarizə aparıblar.
Yarışların ilk günündə altı çəki dərəcəsində müəyyən olunan qaliblər Lənkəran-Astara Regional İdarəsi və turnirin sponsoru tərəfindən müvafiq dərəcəli diplom, medal və pul mükafatları ilə təltif olunublar.
Негізгі бет Yunan-Roma Güləşi üzrə XXVII "Nadir Agayev Turniri". (Masallı 21.10.2023)
Пікірлер: 3