Salam: Aghaz e Muharram
ہے نیا سال مگر بات پُرانی ہوگی،
بچھ گیا فرش عزا مرثیہ خوانی ہوگی،
آج خوشیاں نہیں بس اشک فشانی ہوگی،
ماتمِ شاہ کی پھر شمع جلانی ہوگی،
کس طرح دین خدا آپ کے گھر تک آیا،
یہ حقیقت بھی زمانے کو بتانی ہوگی،
گر ہو درپیش چٹانوں سی مُصیبت کوئی،
نام عباسؑ کا لے لیجئے، پانی ہوگی،
تب ہی پھیلے گا زمانے میں خدا کا پیغام،
کربلا جب تِری ہر لب پہ کہانی ہوگی،
اِس طرف پیاس لبِ سبطِ نبی چومے گی،
اُس طرف دریا تِری تشنہ دہانی ہوگی،
کربلا تیری اسی خاک پہ ٹکڑے ٹکڑے،
ایک صد پارہ جگر جد کی نشانی ہوگی،
بھائی کہتے ہوئے دم توڑتا غازی بولا،
کیسے معصوموں کو اب آب رسانی ہوگی،
یا حسین آپ سے شہزور سے اٹھ نا پائی،
بس خدا جانتا ہے کیسی جوانی ہوگی،
بھائی محفوظ رہے بیٹوں کا صدقہ دوں گی،
ایسی منّت کسی ہمشیر نے مانی ہوگی،
کربلا صبرِ حسینی کی ہے سرحد عابد،
اس سے آگے کی تجھے بیٹا نبھانی ہوگی،
بے ردا دیکھ نہ لے کوئی پھپھی بہنوں کو،
تجھ کو ہر گام پہ ہی خاک اڑانی ہوگی،
یوں تو ہے تُو بھی ید اللہ علی ابنِ حسین،
پر بندھے ہاتھوں سے اک لاش اٹھانی ہوگی،
آگے بازار ہے بھائی یہ کہا زینبؑ نے،
اب تمہیں ہم سے نظر سب کی ہٹانی ہوگی،
جتنی بے دست علمدارِ حسینی دیں گے،
اتنی عباس کے لفظوں میں روانی ہوگی،
Негізгі бет Bichh gaya farsh e aza marsiya khwani hogi - Abbas Naqvi (Hur)
Пікірлер