Jamita Partangiangan Epistel Minggu XVI Trinitas
15 September 2024
Lukas 9:22-27
“Ai denggan do uhum ni Jahowa tu ho”
Huria ni Tuhanta….
Ilustrasi: Quo Vadis Domine. Mangihuthon barita sejarah, Huria na parjolo i tongon mangadopi haporsuhon godang. Lumobi di harajaon ni Kesar Nero. Dibahen Kesar Nero do barita hoaks manang isu halak Kristen do na manutung huta Rom dihatiha i. Siala barita i, gabe dilelei do halak Kristen, ditangkup, disiksa, pola sampe adong muse dipamate. Pokoknya orang Kristen harus dimusnahkan dengan berbagai cara.
Angka parbarita nauli pe ditangkup. Dibahen Kesar ma parenta asa manangkup apostel Petrus, karena dia pemimpin utama orang Kristen di kota Roma. Nunga diparade Kesar Nero sada silang laho mamparsilanghon si Petrus molo nunga tartangkup.
Dibege si Petrus do na diburon Kesar ibana, gabe berusaha do ibana lao manadinghon huta Rom, asa menyelamatkan diri huhut asa boi diatur ibana marbarita nauli sian parsitabunianna di luar kota Rom. Alai di pardalanan di na so panagaman diida si Petrus ma guruna, ima Jesus Kristus mamolus di dalan i. Tarsonggot situtu ma si Petrus marnida guruna i, laos disungkun ibana: “Quo Vadis Domine” (Latin) “Naeng tudia Ho Tuhan?” (Mau ke mana, Tuhan). Laos dialusi Jesus do: “Ahu naeng tu Rom diparsilanghon muse mangganti ho” (Aku mau ke Roma untuk disalibkan kembali menggantikan engkau).
Gabe sadar ma si Petrus mambege hata ni Jesus i, ninna rohana sala do hape manadinghon silang siporsanonhu. Ido umbahen, mulak do muse si Petrus tu huta Rom mangadopi hamateanna i. Dengan kepala tegak, tanpa rasa takut sedikit pun, Petrus kembali ke kota Roma untuk menghadapi kematiannya.
Ditangkup ma si Petrus jala diparsilanghon. Alai diparsilanghon tarbalik, ulu tu toru, pat tu ginjang. Boasa songon i diparsilanghon??? Ibana sandiri do marpangidoan songon i asa diparsilanghon tarbalik, ala ndang layak ibana diparsilanghon dos songon Jesus Kristus i.
Las do roha ni si Petrus di ari hamamatena i, ala nunga disurathon ibana hian: “Ai huboto, tibu nama tadinghononhu balebalengkon, songon naung pinabotohon ni Tuhanta Jesus Kristus tu ahu” (2Petrus 1:14). Las ni roha ni si Petrus ima: Molo diparsilanghon ibana tibu ma ibana pajumpang muse dohot Jesus Kristus na manghaholongi ibana.
Huria ni Tuhanta…..
Boha do hita? Molo ro sungkunsungkun: Quo Vadis orang Kristen? Naeng tudia ho halak Kristen? Naeng melarikan diri do ho? Mabiar do ho diparsilanghon? Naeng paluahon dirim do ho ale halak Kristen? Maila do hamu halak Kristen manghatindanghon Jesus i? Maila do hamu halak Kristen manghatahon hata ni Tuhan i? Ima amang/inang sungkunsungkun tu hita marhite turpuk jamita on.
Mansai porlu situtu do tangkas taalusi sungkunsungkun on di bagasan haporseaonta. Alana sian mulana nunga tangkas dipaboa Jesus haporsuhon nanaeng sitaononNa sian angka panungganei, sintua ni malim, dohot sibotosurat. SitaononNa i pola sampe mate Ibana di hau pinorsilang. Alai ndada marujung olat ni hamateanNa i dipaboa, huhut do dipaboa Ibana na ingkon mulak mangolu do muse Ibana di ari patoluhon (Lukas 9:22). Ima dipaboa Ibana tu angka siseanNa.
Alani i do dibahen Jesus do persyaratan tu manang ise nanaeng manang na giot mangihuthon Ibana. Didok Tuhanta Jesus Kristus: “Ia adong nanaeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu” (Lukas 9:23). Hata: “nanaeng” manang “nasa na giot.” Ndang adong paksaan lao mangihuthon Jesus. Ndang disurusuru, ndang dionjaronjar, jala ndang diancam-ancam; alai manang ise na giot = orang yang mau. Siala giot ni roha do, nionjar rohana sandiri, ibana sandiri na manontuhon, mamillit, mamutushon IHUTHONONNA JESUS.
Molo pilihanna sandiri do mangihuthon Jesus unang be marungutungut molo adong hamaolon dohot resiko na borat. Ndang siungutunguthon MANSOADAHON DIRI dohot MAMORSAN SILANGNA.
Dung taboto persyaratan on, ingkon manuhuk silang, aha responsta? Quo Vadis amang/ inang??? Naeng tudia hita amang/ inang??? Tapahusorhusor ma di bagasan rohanta: “Tongon do ahu mardalan dompak Ho ale Tuhan? Manang mardalan lam mandao ahu sian silangMi?.
Siulahononta ima: Manang tudia pe Jesus i lao tusi ma taihuthon. Nang pe godang do haporsuhon sitaonon na songgop tu hita, manuhuk silang, bahkan agoan hosa; alai dijamin Jesus i do, angka i do na dapotan haluaon dohot hangoluan salelenglelengna. Ai aha ma gunana di jolma nasa portibi on diomo, anggo diago dirina, laos mago disi? (Lukas 9:25). Alanii ingkon satia do hita mangihuthon Jesus. Kita seharusnya bertanya: “Quo Vadis Domine” (Mau ke mana Tuhan) supaya kita tahu jalan Tuhan dan taat mengikut Dia di jalan yang dilalui-Nya. AMEN
Salam Sejahtera, Salam Sahabat, Salam Sehat.
#jamitapartangiangan
#lukas9
#roberthendrasimanjuntak
#robertsimanjuntak
Негізгі бет Jamita Partangiangan : Lukas
Пікірлер: 132