झाला देर बुलावे मारी बाजरी,
कमर घणी मटकावे म्हारी बाजरी।
मन में उंमग धर, पांव खेत कानी ऊठ्या,
घणो ही मिल्यो सुकून चल चल पांव ने,
पण चाल्यो डरतो सो, धीरे पग धरतो सो,
टौण मारसी घणेरा, जाणतो सुभाव ने,
भर भर टिबड़ला, दियो औलमो घणेरो,
मैं भी धर्यो सर माथे, आळमे रे भाव ने,
बोल्या बड़ा दिना बाद, चेत आयो खेत हेत
सहर में जार काई, भूल गया गांव ने,।
घूमर घाल दिखावे म्हारी बाजरी,
झाला देर बुलावे म्हारी बाजरी,
औलमो तो औलमो रें, आपरी जगा पे ठीक
पण कमी राखी कोनी, मान मनुहार में।
लुळ लुळ खम्मा घणी, बाजरी करण लागी,
कागळाे भी आवण री, बोल्यो समाचार में
सीसम सुवागत में चंवर ढुलान लागी,
कोयल गावण आई, म्हारे दरबार में,
चित जको चंचल हो, सारी सुद भूल बैठ्यो,
इतरो मगन भयो, सखा सतकार में,
महफिल खूब सजावे म्हारी बाजरी
झालाे देर बुलावे म्हारी बाजरी
दिग्विजय सिंह गोगटिया
कद तक रैसी संग सखा, कद तक रैसी हेत,
गांव सहर हौवण लग्या, कद तक रैसी खेत।
Негізгі бет झाला देर बुलावे म्हारी बाजरी, गांव का गीत
No video
Пікірлер: 11