تابعونا علي صفحتنا الرسمية www.facebook.c...
كدبة ألفين وتمنتاشر "
.....
ورجعت وحيد،
على حطة ايد اللي سابوني وحيد قبليكي،
قَبل ما اشوفك واسأل نفسي
ازاي زيّك تِبقى وحيدة
دلوقتي انا بشبة نَفسي زمان قَبل ما أحبك
أو بالتحديد...
قبل الأيام ما تنقيلك لِعبة جديدة،
بسأل عنك،
قُدام نقطة تفتيش ثابتة قصاد الرئتين،
واصحابي هناك هما الظباط والروح الدمّ
ازاي عدّت
ازاي سيبتوها تفوت قدامكوا معاها سلاح
وازاي دي ماتسألوهاش مثلا عن ضحكة حديد بتخبيها
بصوا لبعضيهم واتفقوا .. بكلام صامت
وقالولي بصوت راجل واحد
دي عيون مابيتشكش فيها،
واديكي آهو ..
فجّرتي مراكز احساسي، فـَ بقيت مُختل،
او عندي فصام غير فيّا ومن غير تهويل
الصبح بحط صديقي فـِ قايمة الاغتيالات،
وفـِ اخر الليل بسجد وادعيلة بعمر طويل
لكن انا راضي...
بتأمل بعينيا الصياد ويّا سمكتُه
وازاي يشبكها بخيط فـِ ايديه فـَ بتعلق وبتمشي معاه
كات هي جعانة رمالها الطُعم لأن الجوع فرض روتيني
واهو ده تشبيه منصف فعلا،
انا كنت جعان فـَ اصطادتيني
فـَ انا مش زعلان... والله أبدا
واعتبري القلب اللي اتكسر فازة فـ بيتك
حَبيتك آه وانا مش ندمان دة لأن انا فعلا حبيتك
دلوقتي بقيت
على حطة ايد اللي سابوني وحيد قبليكي
بسأل لـ الحيطة سؤال واحد .. والحيطة تكشر زعلانة
كل الأشياء اللي بتخدع ناس فـِ الدنيا
ازاي الدنيا تجمّعهملي فـِ إنسانة
...
فيه عمارة في شارع دولتيان
بصيت على شقه هناك فيها
وفضلت اعدي قصادها كتير
بتخيل عمري في لياليها
قلت ل بواب
فيه بنت جميلة هتيجي معايا في يوم هنا اهو
وهتسكن ضلي ونملا الدنيا عيال وبراح
اياك يوم تهمل طلباتها
او احتى تفكر تضايقها
وان اللي يقرب لكمانجا
يستحمل حُزن اللي تقوله
شاف البواب جوّة عينيا،
أحلام ومداين ومسارح
قالي ماتقلقش من الدنيا
انا فاهم دون ما تكون شارح
في عمارة في شارع دولتيان
عديت الليله هناك صدفه
ف قالولي أن الشقه اتباعت
وان البواب مات امبارح
قلت لنفسي:..
عن وقت كبير عدى ما بيننا
وانا لسة بعلم طفلة ازاي .. تزعل وتصالح وتعاتب
علمها الكاتب مرة تمثل ع الدنيا
اتقنت الدور و بقت بتمثل ع الكاتب
الطفلة اللي انا ربيتها شهور على رجليّا
ولعبت معاها ووريتها حلاوة الايام
كات دايما قبل ما تيجي تنام
بتنشن طلقه على دماغي،
وتسيب الفارغ يتحول لقصايد شعر تقولهالي
الطفلة اللي انا كنت اتبسّم على ضحكتها
كانت يوميا آخر الليل تضحك فـَ عياط عيني وانا جريح
واهي دي الدنيا
بتشوف حاجة خضرا على مسافة تظنها بُستان
أول ما تقربب وتدقق، تطلع مراجيح
صدقت ازاي
مشروع العيلة اللي انا وانتي هَنبقى جذوره
نومك على كتفي فـِ مشاويرنا
او أي مكان شافنا فـِ حالة
فيه أماكن جمعتنا كفاية، انها تسألني على غيابك
بس امبارح
ولا لمبة فـِ شارع شامبليون كات شغالة
واحشاني بجد...
واحشاني انتي اللي انا اعرفها،
مش انتي اللي فـِ جسمك دلوقت
حبيتك ؟ آه حبيت جدا
وبقيت جوة المرايات شايفك
صدقت الكدب اللي انا شايفه
علشان بيعدي على شفايفك
بس انتي نسيتي وأهملتي
ان اللي بيقسى فيه شيء قساه
وبإن الكدب لو اتزين
عمرة ما هيشيل على ضهره حياه
ونسيتي ان الراجل لو داب
ممكن يتحول ناي مثلا
لو حاول أنه يسد جروح خرمت جسمه
هيموت كل اللي قصادة
مع اول نسمة تفوت جواه
..
" خروج "
فيه عيون بتخدعنا ،، وعيون ترجّعنا ،، وعيون تبُصلنا ،، والبصة توجعنا ... فيه كدب بنصدقة وفيه كدب بنحققه ،، وفيه كدب لو من ناس ،، بنحبه وبنعشقة ... العقل جم سألوه ،، ليه القلب ما بيتلمّ ،، قام قال بخاف لو زعل ،، يقطع عليا الدم ،، كان طفل ياجماعة ،، واتقاله من ساعة ،، ان العقارب هنا ،، مش بس في الساعة ... يا ارق كدابة ،، في ارضنا الغابة ،، سيبتيني ولكنك ،، شايفاكي متسابة ،، القصة كان يا مكان ،، حَب وعشق واتخان ،، واللي تعبت عليه ،، اهو طار مع الدخان ،، فـَ ماتقلقيش واقسي، الوقت بينسّي ،، زعلان أوي لكن ،، زعلان على نفسي ،، كم كنتي مضطرة ،، وانا قولت 100 مرة ،، شوفتوها حلوة عشان ،، شوفتوها من برة ... يا جميلة بالكسوة ،، بارفان على القسوة ،، خليتي قلبي يخاف ،، من أي نون نسوة ،، واديني جاي بقول ،، لو ماشي في المعدول ،، خاف مـ الطريق واسمع ،، الأربع نصايح دول
أياك تآمن للي بان طيب
أياك تنور سكة ف تروحلها
أياك تسيب حضنك مداس للبشر
واياك تصدق عين بترتاحلها
..
( مشهد داخلي ):
خبطت ع الباب بهدوء علشان
تتأكد اني مازلت وحيد
دخلت بتدور فـِ الأوضة
عن سر ماتعرفهوش عني
وبعد اما خلاص عرفت اني
غرقان فـِ النوم بحلم بيها
سحبت سكينة من الفُستان
واتجهت بيها على رقبتي
فتحت عينيا على المنظر
ف قالتلي وبرائتها في عيني
فيه فتله فـِ لبسي بتقطعها
لـ اتضايق منها ... تصحيني
ظهرت من بعد ما كان قاتله
لـ الخايفة عليا من النسمة
كُنتي بتدبحي راجل حَبك
واما اتخضيت فجأه حزنتي
اهي دي انتي
و اهي دي الأيام
البطلة وبس بتتغير، لكن بنعيد نفس الأفلام
هفتكرك ..
كل اما هروح متأخر ساعة على معادي
أو كل اما اشرب شاي بحليب ويا سيجارة
هفتكرك كل ما أقوم مـ النوم على تليفوني
أو كل اما اسمع حرف الواو من لفظ " وعود "
هفتكرك كل اما اتمشى واشوف بيت مهدود
أو كُل اما انزل من بينا .. وانا ناسي حاجات
ولحد ما اموت...
ليكي فـِ ذمتي أربع أحضان مش هنساهم
والصورة اللي اتلقطت بالعين مش بالكاميرات
بتمنى الدنيا تكون أحسن جوة عينيكي
توصلي للحلم اللي حلمتيه، بس بدوني
كان نفسي أوارب باب قَلبي
وأقول ان انا فعلا راجع
واستنى النهايات تتغير
والدنيا بتجري وبتسارع
بس انتي مابينك ومابيني
اصبحتي دموع ثابتة في عيني
ولا منها هترجع جوّايا
ولا منها هتزل فـِ الشارع !
Негізгі бет كدبة 2018
No video
Пікірлер: 23