किसान के हालात kavi sammelan #सरकार और किसान #kaviyon ki baat #हरिचंद की कविता #kishan k halat
उल्टी गंगा पहाड़ चढा दी इसा नजारा देख लिया
खेती करता भूखा मरता किसान बिचारा देख लिया
एक मिन्ट की फुरसत ना तूं 24 घन्टे काज करै
रोटी ऊपर नूण मिर्च फेर धरया मिलै सै प्याज तेरै
काम की बाबत सब कुणबे की गेल्यां भाजो भाज करै
फेर भी पेट भराई घर म्हं मिलता कोन्या नाज तेरै
घर म्हं बड़रे बाज तेरै ना हुवै गुजारा देख लिया
खेती करता भूखा मरता किसान बिचारा देख लिया
उल्टी गंगा पहाड़ चढा दी इसा नजारा देख लिया
उठ सबेरे हळ जोड़ै तूं थारा बूढ़ा जावे पाळी सै
छोरा भेज दिया पाणी पै बुढ़िया गई रूखाळी सै
रोटी और जुआरा ले आवे तेरी घर आळी सै
सारा कुणबा मंड्या रहै फिर भी घर मैं कंगाली सै
तू रहै खाली का खाली सै तेरै टोटा भारया देख लिया
खेती करता भूखा मरता किसान बिचारा देख लिया
उल्टी गंगा पहाड़ चढा दी इसा नजारा देख लिया
भूखा मरता करजा लेणे फेर बैंक मैं जावे सै
बाबु जी बाबु जी करकै छीदे दांत दिखावे सै
रिश्वत ले ले ठोक म्हारे पै फेर म्हारा केस बणावे सै
धरती तक गहणैं धरलें जब हमनै कर्ज थ्यावे सै
लूट लूट खावै सै उनका पड़ता लारा देख लिया
खेती करता भूखा मरता किसान बिचारा देख लिया
उल्टी गंगा पहाड़ चढा दी इसा नजारा देख लिया
न्यूं म्हारा पैंडा छुटै कोन्या चाहे दिन रात कमाए जा
हमैं लुटेरा लूट लूट कै बैठ ठाठ तै खाए जा
बामण बणिया जाट हरिजन कहकै हमैं लड़ाए जा
हरिचन्द तेरी बी बा यूनियन न्यूएं लूट मचाए जा
टूटे लीतर पाट्या कुरता फुट्या ढारा देख लिया
खेती करता भूखा मरता किसान बिचारा देख लिया
उल्टी गंगा पहाड़ चढा दी इसा नजारा देख लिया
Негізгі бет किसान के हालात kavi sammelan
Пікірлер: 2