لو شقتك صغيرة اعرف هتعمل فيها إيه ؟ | روشتة ديكور (1):
لو اكبر مشكلة بتواجهك ان شقتك صغيرة فمن كذا سنه في توجه عام من الباحثين والدارسين في مجال الديكور لدراسة حلول للشقق الصغيرة ..
طيب اية المشكلة اللي بتواجهك في الشقة الصغيرة !!
هتحس ان الاثاث كثير في الشقة وكمان مفيش مساحة للتخزين ..
في البداية لزم ارتب اولوياتي واكون عارف ان الشقة ملكية خاصة لصاحبها مش للضيف يعني احاول استغل كل سم داخل الشقة للعميل يعني مش احسن حاجة اني استقطع 50 متر مثلا عشان اعملهم صالون استقبل في ضيوف ..لية !! خلينا نسأل نفسنا الضيف هيجيلي كام مرة في الشهر وبعد جائحة كرونا ممكن بالشهور ميجلناش ضيوف وبالتالي هنخلي فراغ المعيشة مجهز لإستقبال الضيوف
لو هنتكلم عن تقسيم الشقة فهنحاول قدر المستطاع نسبتدل الحوائط بقواطيع ودا عشان الحجب الجزئي هيحسسنا بإتساع المكان علي عكس الحجب الكلي اللي هو الحيطة ,, كمان يفضل دمج وظائف الفراغات زي مثلا المطبخ لوامريكان مفتوح وقتها نقدرندمج السفرة معاه .
الاثاث لزم يكون متعدد الاغراض يعني قطعة الاثاث الواحدة تقوم بأكتر من وظيفة ..
وكمان ممكن نستخدم الاثاث الشفاف ودا بيكون اكريلك مش زجاج وشكلة مناسب في المودرن ,,الاثاث الشفاف مش هتحس بكتلة داخل الفراغ ..
اما في غرف اطفال بستخدم ال bunk bed
ولو العميل مش حابب كل الاثاث يكون متعدد الاغراض ففي شوية شروط بسيطة خد بالك منها وانت بتختار الاثاث اختار المقاسات الاصغر .. في الاثاث كل قطعة لها اكتر من مقاس اختار انت المقاس الاصغر وراعي ان الكراسي والكنب يكون ظهرهم مش عالى وكمان مساند الدراع او المخادع منخفضه ,, كمان ابعد عن الاثاث الضخم تماما لانة مش احسن حاجة عندك
لو هنتكلم عن اثاث غرف النوم فالسرير يفضل يكون من تحت وحدة تخزين ,اما الكمود يفضل ان يكون معلق دا هيحسسك باتساع للفراغ
عنصر المرايات من اهم العناصر داخل الشقق الصغيرة .. المراية لما بتكون كبيرة بتعكس الفراغ مرة كمان يعني هتحسسك ان الفراغ ضعف مساحتة ,, لكن هاخد بالي من مكان المرآة عشان تحقيق الخصوصية هي عاكسة اية !! يعني متعكسش جناحات النوم مثلا او باب حمام ,, وكمان مش احسن حاجة تكون في وشي وانا قاعد
الزجاج كمان من الخامات المهمة اللي هيكون ليها تاثير ايجابي جوا الفراغ ,,
الخامات اللامعة افضل من الخامات المط يعني لو هعمل ارضية بورسلين اعمل مط ولا بيلمع ..؟ لا اعمل لامع ,,
هتاخد بالك وتكون حذر في اختيار الاخشاب لانها من الخامات الدافية لزم تكون الوانها فتحه عشان متاثرش على اتساع الفراغ
هنعتمد في الالوان على الالوان الفاتحة والمحايدة في الدهانات والاثاث وداعشان نحس بوسع الفراغ وكتلة الاثاث نحسها اخف ,, لو هنستخدم خطة لونية يفضل نستخدم خطة الالوان المتماثلة بلاش الوان متضادة اوالخطط اللونية المتعددة الالوان لان دا مش انسب اختيار للمساحات الصغيرة لكن لو العميل حابب استخدام الوان دافية مع الوان باردة مثلا هنستخدمها في صورة pastel color ودا مش هيحسسنا بضيق المكان ,, للفراغ الواحد استخدم لون موحد مش كل حيطة لون ,, السقف افضل لون له الابيض هيدي اتساع للمكان
وانا بختار ورق الحيطة او اقمشة الستاير او التنجيد او حتي تصميم السجاد لزم اراعي ان التفاصيل تكون قليلة يعني النقوش او pattern تكون صغيرة وبسيطة عشان pattern الكبيرة والتفاصيل الكتيرهتحسسني بان المكان ضيق
فمثلا في ورق الحيطة مش هنستخدم النقوش الكبيرة واللي الوانها كتير يفضل النقوش الصغيرة والوانها مقارب للارضية وتكون تكراريه وكذالك السجاد يفضل يكون لون واحد بلاش الاشكال المتداخلة والالوان المتضادة
حجم قطعة السجاد يكون مش كبير من الحيطة للحيطة لان دا مش هيخدم الفراغ بنختار السجادة تكون الارجل الامامية للكراسي والكنب عليها بحيث يكون في ممرات حركة
وانا بصمم وحدات التخزين زي الدواليب او وحدات المطبخ لزم استغل الفراغ افقيا ,, يعني وحدات التخزين اخليها للسقف واختار العمق الاصغر دا هيوفرمساحات تخزين هتحللي اكبر مشكلة بنقابلها في الشقق الصغيرة
الاضاءة الطبيعية اللي هتدخل المكان من خلال الشبابيك الواسعة والكبيرة هتحقق احساس بالراحة للمستخدم وعشان كدا في اختيارنا للستاير هنبعد عن الخامات التقيلة زي القطيفة مثلا ونختار الخامات الخفيفة زي الشيفون اللي هيسمح للشمس انها تدخل وهيحقق دمج بين الفراغ الداخلى والخارجي .. اما حجم الستارة يفضل انة يكون من اول الحيطة لاخرها مش على الشباك بس ويكون من بيت الستارة او من تحت الكورنيشة للارض وافضل وضع يعلى عن الارض نص سم .
في اختيارنا للابواب يفضل نستبدل الباب المفصلي بباب جرار ولونة ميكونش غامق ممكن يكون مراية او زجاج مصنفر
الاكسيسوارات لزم نعتمد على البساطة ونقلل عددها ...فهنستخدم تبلوهات او ارفف بتصميم بسيط مفيش في الوان كتير او صارخة
لو هنتكلم عن الوضع الامثل لشاشة الtv هلاقي ان الشاشة المعلقة على حامل محوري تقدر تخدم اكتر من مكان في الشقة
الرزع والنباتات بيعطي طاقة وحيوية للفراغ فهتحس الفراغ مريح وصحي
هنحاول منعملش تفاصيل كتير في السقف ومستويات لان دا هيحسسك بضيق المكان وكمان هنستخدم شدة الإضاءة العالية لان الاضاءة العالية هتحسسنا بالوسع ,, واحني بنختار النجف نراعي ان خطوطة التصميمية تكون بسيطة وممكن نستخدم الاباليك بدل الابجورات او اللامبديرات
في تصميم الحمامات هنعمل استند شاور مش بانيو عشان نقدر نحدد حجمة براحتنا ,, ويفضل نعمل وحدة تخزين معلقة تحت الحوض ,,,
اختيار البلاطات هنبعد عن التصميمات القوية والالوان الكتير المتضادة والكبيرة و كمان نبعد عن الملامس الخشنة يفضل استخدام الخطوط العرضية في تصميم الحوائط كمان منستخدمش مقاس البلاطات الكبيرة
وفي النهاية مساحة صغيرة مفروشة علي اسس سليمة هتحقق احتياجات المستخدم اكتر من مساحة كبيرة مهدرة
=============================================
للمتابعة على صفحة الفيس بوك برجاء الدخول على الرابط
/ fekrabyrihammohsen
#riham_mohsen
#decorate_your_life
Негізгі бет لو شقتك صغيرة اعرف هتعمل فيها إيه ؟ | روشتة ديكور (1)
Пікірлер: 3