ఈరోజుతో మన అజగవ సాహితీ ఛానల్ పుట్టి ఐదు సంవత్సరాలు పూర్తయ్యింది. ఈ ఐదేళ్ళలో మనం ఎన్నో కథలు చెప్పుకున్నాం, కావ్యాలలోని సంగతులు మాట్లాడుకున్నాం, భగవత్ తత్త్వం గురించి, మహర్షుల మహత్తు గురించి, మన సనాతనధర్మం గొప్పతనం గురించి ఇలా అనేక ప్రామాణికమైన విషయాలను చెప్పుకున్నాం. బాణుడి కాదంబరి, భాసుడి స్వప్నవాసవదత్త, శూద్రకుని మృచ్ఛకటికం, విశాఖదత్తుని ముద్రారాక్షసం, కాళిదాసు మహాకవి మేఘదూతం, రఘువంశం, హాలుడి ప్రాకృతగాథా సప్తశతి ఇలా అనేక సంస్కృత ప్రాకృత రచనలను కథలుగా మలచుకుని చెప్పుకున్నాం. తెలుగు విషయానికి వస్తే పెద్దనగారి మనుచరిత్ర, రామరాజభూషణుని వసుచరిత్ర, శ్రీకృష్ణదేవరాయల ఆముక్తమాల్యద, శ్రీనాథుని క్రీడాభిరామం, పాల్కురికి సోమనాథుని బసవపురాణం, ఇంత అని చెప్పలేనంత బావుండే పింగళి సూరన కళాపూర్ణోదయం, వేదం వేంకటరాయశాస్త్రిగారి ప్రతాపరుద్రీయం, చిలకమర్తి లక్ష్మీనరసింహం గారి గయోపాఖ్యానం, కాళ్ళకూరి నారాయణరావుగారి చింతామణి నాటకం, కందుకూరి వీరేశలింగం పంతులుగారి రాజశేఖర చరిత్ర, అలానే వారిదే సత్యరాజా పూర్వదేశ యాత్రలు మొదలైన తెలుగు కావ్యాలు, నవలలలోని కథలను కూడా మనం మన అజగవలో చెప్పుకున్నాం. అంతే కాకుండా నాలుగు వేదాలు పది ఉపనిషత్తులలో ఏముందన్న విషయాన్ని, 18 పురాణాల సంగతులను, యోగవాసిష్ఠం విశిష్టతను, మణిద్వీప వర్ణనను, న్యాయము, సాంఖ్యము, వైశేషికము, యోగము, పూర్వమీమాంస, ఉత్తరమీమాంస అనే ఆరు ఆస్తికదర్శనాలలోను, బౌద్ధం, జైనం, చార్వాకం అనే మూడు నాస్తిక దర్శనాలలోను చెప్పబడ్డ సంగుతుల గురించి, భారతీయుల విజ్ఞాన సర్వస్వంగా చెప్పబడే గరుడపురాణం విశేషాలను, కౌటిల్యుని అర్థశాస్త్రాన్ని, వాత్స్యాయనుని కామశాస్త్రాన్నీ. 64 కళలంటే ఏవేవి అన్న విషయాన్ని వాటి వివరణను, 124 యక్ష ప్రశ్నలను ఇలా అనేకానేక విషయాలను చెప్పుకున్నాం. తమిళ సాహిత్యంలో చూస్తే తమిళ పంచమహాకావ్యాలలో ఒకటైన సిలప్పదికారమ్ కథను రెండు భాగాలుగా చెప్పుకున్నాం. తమిళ భాషలో వ్రాయబడ్డ భారతీయులందరికీ చెందిన గ్రంథం తిరువళ్ళువర్ వారి తిరుక్కుఱళ్ గురించి కూడా చెప్పుకున్నాం. ఇంకా ఆండాళ్ అమ్మవారైన గోదాదేవి రచించిన 30 పాశురాల తిరుప్పావై గురించి, పన్నెండుగురు ఆళ్వారుల దివ్య చరిత్రల గురించి కూడా వివరంగానే చెప్పుకున్నాం. ఇక షట్చక్రవర్తుల కథలు, సప్త చిరంజీవుల కథలు, తెలుగువారి ప్రాచీన జానపద కథ బాలనాగమ్మ కథ, స్వామిభక్తుడైన గొడుగుపాలుని కథ ఇలా అనేక కథలు చెప్పుకున్నాం. చాలామందికి అభిమానపాత్రమైన కాశీమజిలీ కథలను వందకుపైగా భాగాలుగా చెప్పుకున్నాం. కొంతకాలంగా కాశీమజిలీలు ముందుకు సాగలేదు. త్వరలోనే మరలా ఆ ప్రయాణం కూడా మొదలుపెడదాం. ఇవి కాకుండా మహాబలుడు కొడి రామ్మూర్తి నాయుడు, గొప్ప కవి రచయిత చిత్రకారుడు అయిన అడవి బాపిరాజు, ఆధునికకాలంలో మహోన్నత భారతీయ విజ్ఞానవేత్త అయిన జగదీశ్ చంద్రబోస్ మొదలైనవారి గురి జీవిత కథలను కూడా సంక్షిప్తంగా చెప్పుకున్నాం. అలానే తెలుగు సాహిత్యంలో ముద్దు మీద వచ్చిన మొదటి పద్యం గురించి, కాఫీ దండకం, దోమ దండకం గురించి, ప్రసిద్ధుల హాస్యోక్తుల గురించి, విశ్వనాథ సత్యనారాయణ గారు, శ్రీశ్రీ గారు, సినారె గారు మొదలైనవారి చతురోక్తుల గురించి, కరుణశ్రీ గారి సమస్యాపూరణల గురించి, దాశరథి గారు, కృష్ణశాస్త్రిగారు, శ్రీశ్రీ గారు సినారె గార్ల కవిత్వ పరిచయాల గురించి, నలందా విశ్వవిద్యాలయం గొప్పతనం గురించి, భారతదేశంలో ప్రాచీన రాజ్యాలు ప్రస్తుతం ఏ ఏ పేర్లతో పిలవబడుతున్నాయన్న విషయం గురించి, తెనాలి రామలింగని హాస్య కథలు, పద్యాల గురించి, పొన్నియన్ సెల్వన్కు తెలుగువారి మహాభారతానికి ఉన్న సంబంధం గురించి, విజ్ఞాన భైరవ తంత్ర గురించి, తావోయిజమ్ గురించి, జాషువా గారి శిశువు, విశ్వనరుడు పద్యాల గురించి, 14 లోకాల సంగతుల గురించి, నూటపదహార్లు అన్న మాట ఎలా పుట్టిందన్న విషయం గురించి, ఇంకా సనాతన ధర్మానికి సంబంధించిన అనేక విషయాలు, కథల గురించి బోలెడన్ని వీడియోలలో చెప్పుకున్నాం. తెలుగు సినిమా పుట్టిన దగ్గర నుండి ఇప్పటివరకూ ఉన్న అనేకమంది గీతరచయితలలో అరవై ముగ్గురు రచయితల పాటలను ప్రస్తావిస్తూ ఒక వీడియో చేశాను. ఈ విధంగా ఈ ఐదేళ్ళలో అనేక సాహిత్యరీతులపై సుమాకు 350 వరకూ వీడియోలు చేశాను. మీ ఆదరాభిమానానలతో ఇంకా అనేకంగా చేస్తూనే ఉంటాను.
చిన్నప్పుడు మా అమ్మ అన్నం తినిపిస్తూ చెప్పిన రామాయణ భారత కథలు, మా నాన్నగారు రాత్రివేళ నన్ను మా అక్కను ప్రక్కన పడుకోబెట్టుకుని పాడిన పోతనగారి భాగవత పద్యాలు నన్ను సాహిత్యంవైపు నడిపించి ఉంటాయేమో అనిపిస్తుంటుంది. ఇక పుస్తక పఠనం అన్నది చందమామ బాలమిత్ర, బుజ్జాయి, బొమ్మరిల్లు మొదలైన బాలసాహిత్య పత్రికలతో మొదలైంది. షాడో మధుబాబు, యండమూరి నవలలతో మరికొంత ముందుకువెళ్లింది. ఆపై మల్లాది రామకృష్ణశాస్త్రి గారు, శ్రీపాద సుబ్రహ్మణ్యశాస్త్రిగారు, చాసోగారు, రావిశాస్త్రిగారు, తిరుమల రామచంద్రగారు, చలంగారు, అడవి బాపిరాజుగారు, జాషువాగారు, కరుణశ్రీ గారు, బుచ్చిబాబుగారు, ముళ్ళపూడివారు మొదలైనవారి రచనలతో తెలుగు సాహిత్యం రుచి ఎంతటితో తెలిసింది. కవిసమ్రాట్ విశ్వనాథ సత్యనారాయణగారి వంటి మహారచయిత రచనలు చదివాక తెలుగు సాహితీకారులస్థాయి సంస్కృత మహాకవుల స్థాయికి తీసిపోదని అనిపించింది. నాకు నచ్చిన రచయితలు ఎందరో ఉన్నా విశ్వనాథ సత్యనారాయణగారే నా వరకూ నాకు అత్యుత్తమ రచయిత. అలానే సినీగీత రచయితలలో వేటూరివారంటే నాకు ఎంతో అభిమానం.
ఇక సంస్కృత సాహిత్యాన్ని చదివి అర్థం చేసుకోవడానికి వావిళ్ళవారి ప్రచురణలు నాకెంతగానో ఉపయోగపడ్డాయి. తెలుగు సాహిత్యాన్ని నాణ్యమైన రూపంలో, ప్రామాణికతతో తెలుగువారికి అందించిన సంస్థ వావిళ్ళ వారి ప్రచురణాలయం. తెలుగువారంతా ఆ సంస్థకు కృతజ్ఞులుగా ఉండాలి.
సనాతన ధర్మాన్ని, భారతీయ సాహిత్యాన్ని నా పరిధిలో నేను మీకు పరిచయం చేయగలుగుతున్నానంటే అందుకు ప్రధాన కారణం మీ ఆదరణే. మీ అభిమానమే అజగవను నడిపిస్తోంది.
ధన్యవాదములతో
మీ
రాజన్ పి.టి.ఎస్.కె
Негізгі бет మీ ఆశీస్సులతో 'అజగవ'కు ఐదేళ్ళు | Ajagava 5th Anniversary | Rajan PTSK
No video
Пікірлер: 101