Cөйле десең, сөйлейін, сөз келгенде,
Киер көйлек шаруаға бөз келгенде,
Тамаша-ау, денің сау ма құдаша-ау!
Айт дегенде несіне іркілейін,
Үлкен-кіші, жақсылар кез келгенде,
Ызғар-ау, денің сау ма қыздар-ау!
.
Қайырмасы:
Тобылғының түбінен қазық алдым былық-былық,
Бөдененің етінен азық алдым сылық-сылық.
Әбәу қыздар, әбәу бақ, тырна маттай туай-тақ,
Екі ма нақ, нақ-нақ.
Ішім-ай, дертім-ай, қыздар-ай, қырғын-ай,
Қыр басында қыз ойнақ, күндіз-мәжіліс, түнде ойнақ,
Екі ма нақ, нақ-нақ.
Айта бар, қайта бар, қыздарға сәлем айта бар,
Жиналған қыз бозбала, қосылып әнге сал!
.
Кел екеуміз домбыра қосылайық,
Айқай салып, ән салып жосылайық.
Ызғар-ау, денің сау ма қыздар-ау!
Бекер қарап құр босқа отырғанша,
Бозбалаға болмай осы лайық?!
Тамаша-ау, денің сау ма құдаша-ау!
.
Ғарифолла Құрманғалиевтың шәкірті, фольклортанушы Бөрібай КӘРТЕН:
«Халық әні «Нақ-нақтың» әуелгі орындаушысы, жеткізушісі - атақты актер Елубай Өмірзақов. «Елубай түрлі мимикамен, дауысын мың құбылтып орындай-тұғын» дейтін қарт ұстаз. Бірақ ел ішіне кең таралып, танылуы - Ғарифолла Құрманғалиевтың насихаттауында екені де еш талассыз ақиқат.
Эстрада-цирк өнері студиясында оқып жүргенде менен өзгесі бұл әнге ықылас таныта қоймады. Осы шығарманы Ғарифолла Құрманғалиевтан үйреніп жатқан сәтім үнтаспада жазылып қалған.
Келесі бір сабақта «Нақ-нақты» қайталаттырып жатқанда: «Сөздері түсініксіз ғой» деп ем, сонда ұстаздың: «Көбісі өтірік сөздер ғой, күлкі үшін құрастыра салған» дегені әлі жадымда...
Атап өткен сабақ үстіндегі бір жарым сағаттық сол үн таспадағы жазба 1983 жылдың күз айында түсірілген. «Салтанат» ән-би ансамблінің жеке орындаушысы, курстасымыз Күмісай Байтілеуова жеке архивінде сақтап келген еді. Одан көшіріп алған бір-бір данасы Сәуледе, менде...
Ғарифолла Құрманғалиевтың педагогикалық іс-тәжірибесін зерделеуге мүмкіндік жасайтын нақты тарихи дәлел...
Халық әні «Нақ-нақ»турасындағы білетін дерегім - осы».
Негізгі бет Нұрым Асқанов - Нақ-нақ (Халық әні)
Пікірлер: 9