喺今日鐵路事宜小組,討論有關鐵路發展策略2014嘅最新項目進展,來緊香港有唔同嘅鐵路項目,樣樣都好影響民生,所以我向政府提出對屯門南延線、北環線南延成中鐵線、洪水橋站嘅各項關注。
屯門南延線
屯門南延線加左屯門第16區站後,估計可以起到大約3000-4000個私人單位。如果用物業發展權批俾港鐵,換取獨自承擔整個鐵路項目,包括屯門泳池遷移同其他社區設施原區重置,我認為係可以計夠數,唔知政府又計數計成點?
北環線南延成中鐵線
北環線由錦上路接駁到古洞,將來又會南延變中鐵線接駁到荃灣線或者東鐵線。雖然我地圓桌係極力支持前者反對後者,但係無論點樣,將來北部都會區嘅居民可唔可以唔洗再係錦上路轉車,可以直達終點嘅葵芳站或者九龍塘站呢?
洪水橋站
屯門南延線同洪水橋站都會係2030年就起好,但係洪水橋新發展區就有20萬人,加埋新增嘅元朗南發展區,屯門南延線就有40萬新乘客。因為第五條跨海鐵路要2038年先起好,中間呢8年期間,居民出入就一定會逼爆屯馬線。朗屏、元朗嘅人一定上唔到車,政府會唔會要求港鐵係呢8年間,提供足夠嘅港鐵K巴將呢2個站嘅乘客,極速經大欖隧道接駁去到荃灣線,俾乘客有多一個選擇?
另外,將來屯馬線洪水橋站接駁第五條跨海鐵路會唔會都係本地優先?做到同一方向係同一月台轉車,好似荃灣線同港島線係金鐘同一月台轉車!
對於呢3個鐵路項目,政府就回應指屯門南延線仲係設計階段,有關最後係唔係「鐵路+物業」嘅發展模式會再同港鐵傾,研究下點提供財務資助嘅模式。另外,因為中鐵線仲係初步建議階段,不過政府已經收到曬我嘅意見,會仔細研究。最後關於居民出入逼爆屯馬線嘅問題,政府只係講屯馬線日後最多可以加強至每小時26班車,反而K巴嘅服務就唔提,只係講港鐵會密切留意屯馬線乘客量增加班次去滿足需求。不過,第五條跨海鐵路同屯馬線洪水橋站嘅月台連接安排,政府亦都收到我嘅意見,會再仔細研究。
最後,東涌線延線、屯門南延線、北環線、洪水橋站同古洞站都近呢2年內動工,現屆政府一定走唔甩,咁多個項目係唔係一定可以會發生呢?政府最後都有交代清楚東涌線延線、屯門南延線同古洞站都會年內動工。
Негізгі бет 【鐵路發展|屯門南延線採用鐵路加物業發展模式|北環線南延後無需轉乘直達終站|洪水橋站力爭同一方向、同一月台轉乘】
Пікірлер: 4