將軍澳137區填海起住宅,商業設施,社區康樂同休憩設施,又有新鐵路站,代替而家嘅填料區等嘅厭惡性設施,本來應該個個都舉腳贊成,但初初方案一出,日出康城嘅居民就好大反應,驚喺正佢哋門口填嗰20公頃,又起晒啲高樓大廈食塵之餘又阻到日後嘅景觀。
最後文件公布填海位置係離民居較遠嘅喺創新園南邊,我聽到康城居民嘅反對聲音都好似少咗,但仲有人反對喺附近填兩公頃起保護鐵路入海結構。
但老實講呢個結構唔做就唔得嘅,如果想爭取居民支持,就一定要疏導下佢哋一直以嚟嘅怨氣啦。由一開始康城居民主要就投訴鐵路班次疏落,繁忙時間要成6至7分鐘一班,非繁忙時間陣間要去到成12分鐘,港鐵上年就承諾會提升信號系統,但我就唔明咩意思,而家港鐵個信號系統撳個掣最快可以去到兩分半鐘一班,問題係佢肯唔肯做啫,而家就似乎係港鐵因為唔夠客所以唔做。我會議上要求局方俾啲壓力港鐵,喺項目過咗之後,即刻提升到繁忙時間三分半鐘,非繁忙時間就七分鐘一班,要求局方工務小組時回應我。
發展局常秘俾就似乎唔係好明我意思,一路喺度講未來137區多咗人港鐵就會加密班次,同埋爭購列車。而我講緊嘅係因為填嗰兩公頃係起嚟俾港鐵,如果唔加密班次,清清啲舊債又點可以爭取到居民支持呢?
Негізгі бет 【填海前先疏民怨 清舊債加密班次】
Пікірлер