လေကြောင်းဗုံးကြဲ တိုက်ခိုက်ခံနေရချိန် အသက်ဘေး ကင်းလွတ်ဖို့ ဘယ်လို ပြုမူ နေထိုင် သင့်တယ်ဆိုတဲ့ အကြံပေးချက် တချို့ကို MFP ပရိတ်သတ်တွေအတွက် ဖော်ပြအပ်ပါတယ်။
၁။ လေကြောင်းရန် အချက်ပေးစနစ်တွေက သတိပေးချက်တွေကို အမြဲမပြတ်လေ့လာစောင့်ကြည့်ပါ။
တော်လှန်ရေးအဖွဲ့တွေ၊ အရပ်ဖက် ကူညီကယ်ဆယ်ရေး အဖွဲ့တွေ၊ ဒေသခေါင်းဆောင်တွေနဲ့ ယုံကြည်ရတဲ့ သတင်း အရင်းအမြစ်တွေက ထုတ်ပြန်ထားတဲ့ သတိပေး ညွှန်ကြားချက်တွေကို လိုက်နာပါ။
ဒေသအလိုက် အရေးပေါ် လေကြောင်းရန် အချက်ပေး စနစ်တွေ၊ တော်လှန်ရေး အင်အားစုတွေရဲ့ ရေဒီယိုနဲ့ ဆိုရှယ်မီဒီယာတွေကို အချိန်နဲ့တပြေးညီ စောင့်ကြည့်ပြီး သတိပေး လမ်းညွှန်ချက် တွေကို လိုက်နာပါ။
၂။ လေကြောင်းတိုက်ခိုက်မှုအတွင်း လုံခြုံဘေးကင်းတဲ့နေရာကို ရှာဖွေပုန်းခိုပါ။
လေကြောင်းရန် သတိပေးချက် ကြေညာထားတဲ့၊ ပစ်မှတ်ဖြစ်နိုင်တဲ့ နေရာတွေကနေ ဘေးကင်းရာကို ချက်ချင်း ရှောင်ရှားပါ။
လက်နက်ကြီးသံနဲ့ လေယာဉ်သံ ကြားရပါက ကြိုတင် ပြင်ဆင်ထားတဲ့ ဒါမှမဟုတ် အခိုင်အမာ တည်ဆောက် ထားတဲ့ ဗုံးခိုကျင်းတွေ၊ မြေအောက်ခန်းတွေအတွင်း ပုန်းခိုပါ။
လေကြောင်း တိုက်ခိုက်မှု ဖြစ်ပွားချိန် နေအိမ်အတွင်း ရှိနေပါက နေအိမ် အဆောက်အဦးရဲ့ အလုံအခြုံဆုံး အခန်းကို ပုန်းခိုစရာအဖြစ် ရွေးချယ်ပါ။ (အတတ်အနိုင်ဆုံး ပြတင်းပေါက်တွေ မရှိတဲ့ အခန်းကို ရွေးချယ်ပါ။) ပြတင်းပေါက်တွေ ရှိပါက ပြတင်းပေါက်နဲ့ ဝေးတဲ့ နေရာက စာပွဲလို အကာအကွယ်တွေအောက် ဝင်ရောက် ပုန်းခိုပါ။
ဦးခေါင်းကို လက်နှစ်ဖက်နဲ့အုပ်ပြီး တံတောင်နဲ့ မြေကြီးကိုထောက်ကာ မှောက်လျက်နေပါ။
လေကြောင်း တိုက်ခိုက်ခံရချိန် ကွင်းပြင်မှာ ရှိနေပါက မြေအနိမ့်ပိုင်း နေရာကို ရှာဖွေပါ။ ပြီးလျင် ဉီးခေါင်းကို လက်နှစ်ဖက်နဲ့ အုပ်ပြီး မြေကြီးကို တံတောင်နဲ့ထောက်ကာ မှောက်လျက်နေပါ။
ပေါက်ကွဲမှု ဖြစ်ပွားချိန် ပြင်းထန်တဲ့ လေထုဖိအား သက်ရောက်မှုဟာ အဆုတ်ကို ထိခိုက် ပျက်စီးနိုင်ပါတယ်။ အဲ့ဒီလို အဆုတ် ထိခိုက်မှုက ရှောင်ရှားနိုင်ဖို့ ပေါက်ကွဲမှုတွေ ဖြစ်ပွားနေချိန် ပါးစပ်ကို ဖွင့်ဟထားပါ။ မျက်စိ ထိခိုက်မှု လျော့နည်းစေဖို့ မျက်စိကို ပိတ်ထားပါ။
၃။ ပစ်ခတ်တိုက်ခိုက်သံ၊ ပေါက်ကွဲသံ၊ လေယာဉ်သံ မရပ်မချင်း ပုန်းခိုးရာ နေရာကို မစွန့်ခွာပါနဲ့။
ပစ်ခတ် တိုက်ခိုက်သံ၊ ပေါက်ကွဲသံ၊ လေယာဉ်သံတွေ ရပ်စဲသွားပါက ဘေးကင်းလှုံခြုံမှုအတွက် ပတ်ဝန်းကျင်ကို ဦးစွာ စစ်ဆေးပါ။ လေကြောင်းနဲ့ ပစ်ခတ်တိုက်ခိုက်မှုတွေ ရပ်စဲသွားပြီး လုံခြုံဘေးကင်းကြောင်း သေချာမှ ပုန်းခိုရာ နေရာကို စွန့်ခွာပါ။
၄။ ပေါက်ကွဲစေတတ်တဲ့ စစ်လက်နက်ပစ္စည်းတွေနဲ့ တခြား အန္တရာယ်တွေကို သတိပြုပါ။
တကယ်လို့ လေကြောင်း ပစ်ခတ်မှုအတွင်း နေအိမ် (ဒါမှမဟုတ်) ပုန်းခိုရာ နေရာတဝိုက် ထိခိုက် ပျက်စီးမှုတွေ တွေ့ရပါက မပေါက်ကွဲဘဲ ကျန်ရှိနေနိုင်တဲ့ စစ်လက်နက် အကြွင်းအကျန် ပစ္စည်းတွေ၊ လျှပ်စစ်ဝါယာကြိုးတွေ၊ မှန်ကွဲစ တွေကို သတိပြုရှောင်ရှားပါ။
ကိုယ်တိုင်က လုံခြုံတဲ့ အနေအထား ရှိပါက ထိခိုက်ဒဏ်ရာ ရသူတွေကို ကူညီကယ်ဆယ်ပါ။
(လေကြောင်းတိုက်ခိုက်မှုတွေ ထပ်မံ ဖြစ်ပွားနိုင်ချေရှိလျင်) အဲ့ဒီနေရာကို ချင်ချင်းစွန့်ခွါပါ။
ပေါက်ကွဲစေတဲ့ စစ်လက်နက် အကြွင်းအကျန် ပစ္စည်းတွေ တွေ့ရှိရပါက အဲ့ဒီ နေရာကို ချက်ချင်း စွန့်ခွါပြီး သက်ဆိုင်ရာ ဒေသအဖွဲ့အစည်းတွေကို ချက်ချင်း အကြောင်းအကြားပါ။
ကိုးကား - Center for Civilians in Conflict
#Mandalay_Free_Press_MFP
Негізгі бет လေကြောင်း ဗုံးကြဲ တိုက်ခိုက်ခံရချိန် ဘယ်လို ပြုမူ နေထိုင်သင့်လဲ
Пікірлер